Sekretáriu Estadu Kooperativa (SEKoop), Elizario Ferreira, hala'o diálogu ho grupo kooperativa HOKIFU iha Suku Liurai, Postu Administrativu Aileu Vila, Munisípiu Aileu, sábadu (14/08). Imajen TATOLI/Antónia Gusmão

AILEU, 14 agostu 2021 (TATOLI)-Sekretáriu Estadu Kooperativa (SEKoop), Elizario Ferreira ho nia delegasaun, sábadu ne’e, vizita  grupu kooperativa rua iha Suku Liurai, Postu Administrativu Aileu Vila, Munisípiu Aileu.

Notísia Relevante : SEKoop prepara joven 199 mobiliza populasaun partisipa iha kooperativa

Iha vizita ne’e SEKoop ho nia delegasaun haree besik liután atividade grupu sira-ne’e nian no rona no rejista preokupasaun ho difikuldade grupu  kooperativa sira-nian iha ámbitu propagasaun COVID-19 ligadu ho implementasaun Estadu Emerjénsia.

Sekretáriu Estadu Kooperativa (SEKoop), Elizario Ferreira, foto hamutuk ho grupo kooperativa CU-HIKHMOR iha Suku Liurai, Postu Administrativu Aileu Vila, Munisípiu Aileu, sábadu (14/08). Imajen TATOLI/Antónia Gusmão

SEKoop Elizario Ferreira, enkoraja populasaun sira ne’ebé halibur malu iha grupu kooperativa sira, hanesan grupu kooperativa Hahú Ohin Ku’u iha Futuru (HOKIFU) no Kooperativa Kréditu Union Hisik Kosar Hadi’a Moris (CU-HIKHMOR) ne’ebé lokaliza iha Suku Liurai atu labele baruk ka dezanima ho situasaun ne’ebé daudauk mundu enfrenta  pandemia COVID-19, tanba produtu-sira ne’ebé grupu sira prodús Governu liuhosi SEKoop sei buka maneira oinsá transporta ba merkadu ka loja sira iha munisípiu no Dili.

“Vizita ida ne’e atu enkoraja imi atu aselera filafali atividade kooperativa, no husu atu labele dezanima ho situasaun COVID-19,” Sekretáriu Estadu Elizario Ferreira, hateten.

Kona-ba produtu sira ne’ebé grupu kooperativa sira prodús SEKoop hanoin ona katak kooperativa sira rasik bele transforma-an sai mós merkadu ba produtór-sira oinsá maka kanaliza produtu sira ne’ebé prodús to’o nivel nasionál.

“Populasaun sira kuda modo la presiza lori to’o merkadu, maibé ema bele tun direta hodi foti, tanba ne’e maka ita serbisu hamutuk hodi identifika problema atu ita bele buka solusaun ba problema ne’ebé ita rasik enfrenta,” Elisário hateten.

Kona-ba formasaun ba membru grupu kooperativa sira, nune’e mós harii sede, Sekretáriu Estadu Elizario Ferreira, pronunsia katak, kestaun hirak ne’e prevee ona iha programa SEKoop nian no sei realiza iha tempu besik ba formasaun no apoia ekipamentu.

Prezidente Kooperativa HOKIFU, Abril Binamo Simões relata, kooperativa HOKIFU harii iha tinan 2019 no daudaun ne’e akumula ona membru 200 no rai ona osan iha kooperativa hamutuk $158.523.

“Osan sira ne’e uza ba harii sede no atinje ona 34% tanba hasoru difikuldade finanseira, maibé kona-ba atividade kooperativa nian kontinua la’o. Difikuldade ne’ebé ami enfrenta maka rekursu ne’ebé mak atu jere orsamentu ne’ebé ami tau iha kooperativa tanba ami iha ona osan, maibé ami jere lahatene tanba ne’e ami husu SEKoop atu kapasita ami iha kontabilidade nian,” Abril Binamo Simões hateten.

Iha sorin seluk, Prezidente Kooperativa CU-HIKHMOR, Lourdes Ramos agradese ba prezensa SEKoop nian tanba bele rona direta sira-nia preokupasaun.

“Kooperativa ne’e ninia atividade mak rai osan, alende ne’e halo mós atividade seluk iha área ortikultora nian, signifika membru sira maioria agrikultór, tanba ne’e, husu atu SEKoop bele kapasita membru sira hodi hasa’e liután produsaun,” Lourdes Ramos hateten.

Reprezentante autoridade Suku Liurai, Leonato de Araújo konfirma katak, durante ne’e autoridade suku sempre apoia atividade sira ne’ebé komunidade hala’o.

“Durante ami observa joven sira ne’ebé ramata eskola sekundária sira la kontinua eskola, maibé sira la’ós halimar de’it, sira kuda modo hamutuk ho sira-nia inan-aman. Autoridade durante ne’e tau-matan no la’o hamutuk ho kooperativa tanba ami mós nu’udar membru,”  Leonato de Araújo haktuir.

Autoridade Suku Liurai komprometidu apoia atividade kooperativa-sira nian hodi kontinua hala’o atividade nune’e bele ajuda ekonomia família.

Jornalista   : Antónia Gusmão

Editór        : Francisco Simões

HAKEREK NO HATÁN

Please enter your comment!
Please enter your name here