Koordenadór Forsa-Tarefa ba Prevensaun no Mitigasaun surtu COVID-19, Rui Maria de Araújo. Imajen TATOLI/Egas Cristóvão.

DILI, 14 agostu 2021 (TATOLI)—Sala Situasaun Sentru Integradu Jestaun Krize (CIGC-SS, sigla portugés), sábadu ne’e, rejista kazu pozitivu 151, rekuperadu 40 no kazu ativu 1.940.

Notísia Relevante : COVID-19, pozitivu 213 no ativu 1.829

“Kazu foun 151 ne’e mai hosi Dili 100, Ermera 18, Liquiça 16, no munisípiu seluk hamutuk 17, kompostu hosi mane 70 no  feto 81,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu imprensa ne’ebé Agência Tatoli asesu.

Hosi totál kazu detetadu foun, ohin, ho idade 20-36 (23,8%) entre tinan 12-59 na’in 106  (70%), idade 60 mai kraik na’in-sia (9). Hosi kazu detetadu foun, ohin, 56 kazu ka 37,1% sintomátiku (hatudu sintoma).

Kumulativu kazu konfirmadu sura hosi loron  21 marsu 2020 to’o  loron14 agostu 2021 hamutuk 12.423. Hosi horisehik mai ohin, teste ne’ebé Laboratóriu Nasionál Saúde halo hamutuk 475 PCR, ho detallu hanesan tuir-mai, Vijilánsia sentinela na’in  32, rastreiu ba kontaktu ka Contact tracing  129,  Rastreiu Aleatóriu  ka Random Screening nain 63, viajen sai-hosi serka sanitária hosi Dili 195,  Viajen internasionál na’in 24, Follow up iha kuarentena na’in 32.

Totál testes PCR ne’ebé halo horisehik 13 agostu iha munisípiu-sira seluk, RAEOA no HNGV hamutuk 478, ho detalla hanesan tuir-mai, Baucau 102, Ermera na’in-lima, Maliana 42, Maubisse 71, RAEOA 38, Suai 36, Viqueque ba’in-hitu no HNGV 177.

Totál doze vasina ne’ebé fó ona ba populasaun elijível tinan 18 ba leten, to’o ohin dadeer 10:00, loron 13 agostu tuir sistema informasaun Saúde iha Ministériu Saúde, totál  kumulativu 1ª doze iha Dili (70,6%) no  totál  kumulativu 2ª doze  iha Dili (48,8%).

Ema ne’ebé simu ona vasina doze dahuluk iha Timor-Leste  (44,9%) no simu ona doze daruak (16,8%).

Atu bele hatene surtu ida ninia evolusaun no mós surtu ne’e aumenta ka diminui, indikadór seluk ne’ebé matenek-na’in epidemiolojia nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et  moras ida.

Hosi insidénsia COVID-19 iha Timor-Leste, durante loron hitu ikus maka 10,3/100 mil abitante, enkuantu ba de’it munisípiu Dili 20,9/100 mil abitante, no insidénsia iha munisípiu Ermera 13,9/100 mil abitante tuir kedas Covalima ho insidénsia 10,7/100 mil abitante, RAEOA ho insidénsia 9,7/100 mil abitante, Bobonaro ho insidénsia 6,7/100 mil abitante, Ainaro ho insidénsia 6,1/100 mil abitante, hafoin Aileu ho insidénsia 5,6/100 mil abitante.

Ida-ne’e hatudu katak, insidénsia munisípiu Dili, ho Ermera nian tuituir malu aas liu iha Timor-Leste laran tomak, enkuantu munisípiu Covalima, Bobonaro, Ainaro, Aileu ho RAEOA  mós hatudu risku aas liu, atu hetan da’et, no hada’et tutan virus SARS-CoV-2, iha komunidade nia leet.

Iha 14 agostu  2021, izolamentu Vera Cruz halo tratamentu ba kazu detetadu na’in 37, iha área obstetrísia na’in 12 no iha medisina interna na’in 21,  iha sirurjia na’in-rua, pediatria na’in-rua.

Iha obstetrísia na’in 12 kategoria kaman hotu. Iha área medisina interna  na’in 21, sia  kategoria grave (ida uza ventiladór)  na’in-ualu uza oksijéniu, na’in 12 kategoria  moderadu, na’in-rua iha sirurjia kategoria kaman hotu, na’in-rua pediatria kategoria kaman.

Númeru kazu moderadu no grave ne’ebé baixa iha Vera Cruz, hatudu katak, bainhira ema barak liu detetadu pozitivu, barak-liu tan mak sei baixa ho kategoria moderadu no grave.

Ba populasaun iha Timor-Leste laran tomak, maski simu ona vasina, favór respeita nafatin regra prevensaun no ijiene individuál, ne’ebé Governu hatuur ona, atu prevene moras COVID-19 da’et ba mai.

Regra sira-ne’e, mak hanesan uza máskara, fase-liman beibeik ho sabaun ka dezinfetante ruma ,evita kose liman ba matan, inus ho ibun bainhira kumprimenta malu, la presiza ka’er liman, bensa-liman, rei-malu ka hako’ak malu, evita halibur malu barak  hamriik ka tur do’ok husi ema seluk, mínimu metru ida ho balun.

Jornalista   : Antónia Gusmão

Editór        : Francisco Simões

HAKEREK NO HATÁN

Please enter your comment!
Please enter your name here