Merkadu roupa obralan iha Maliana, Munisipiu Bobonaro. Imajen Tatoli/Sérgio da Cruz

BOBONARO, 14 agostu 2021 (TATOLI)-Negosiante sira roupa obralan  iha Merkadu Maliana, Munisipiu Bobonaro, laran susar tanba roupa obralan ne’ebé sira fa’an la folin.

Dezde pandemia global COVID-19 no aplikasaun serka sanitaria ho estadu emerjénsia halo ema ladún ba ona merkadu no la halibur malu iha merkadu. Atividade sira, hanesan eskola, atividade relijiozu no atividade kostume nian suspende hotu. Ho nune’e, halo ema laiha interese ba merkadu atu sosa sasán hanesan loron sira bain-leet ka loron sira normal molok pandemia COVID-19.

Domingas Barreto, Bendita ho Ana Flora Moniz, nu’udar negosiante roupa obralan iha Merkadu Maliana, espresa sira-nia  laran susar, tanba oras ne’e sira la hetan rendimentu.

Se iha situasaun normál, Domingas Barreto, Bendita ho Ana Flora Moniz, bele hetan rendimentu hosi fa’an roupa obralan ne’e purvolta $50.00-$60.00 kada loron, mas oras ne’e, lae ona. loron ida hetan rendimentu $5.00-$7.00 de’it mós susar tebe-tebes.

“Agora ema laiha liu, talvés  roupa sira ami tara ne’e loron habai to’o kulapur de’it tanba ema la mai sosa. Ami loke foun mós ema mai fihir liu de’it  tanba COVID-19 ne’e osan laiha,” Domingas Barreto hateten ba Agência Tatoli iha Merkadu Maliana, sábadu ne’e.

Bainhira iha loron bazar nian ne’ebe Estadu aplika kada semana ida sábadu, Domingas Barreto, Bendita ho Ana Flora Moniz, haktuir, abitante sira ho postu administrativu mai bazar, maibé entuziazmu sosa roupa obralan lahanesan tempu sira liubá.

“Tebes. agora ne’e osan arraska. Serbisu laiha, sulan de’it iha uma. Ami rona osan mós laiha,”  negosiante sira-ne’e hateten.

Roupa obralan sira-ne’e, Domingas Barreto, Bendita ho Ana Flora Moniz, sosa hosi Dili kada karon $120.00 no bainhira loke karon ida ba fa’an, ema sosa la to’o tuir osan inan tanba laiha rendimentu.

Tuir Observasaun Agência Tatoli iha fatin fa’an roupa, negosiante barak mak kumpre protokolu saúde  publika, hanesan uza máskara, balun prepara bee-moos tau iha sira-nia baraka fa’an sasán nia oin.

Jornalista   : Sérgio da Cruz

Editor        : Francisco Simões

HAKEREK NO HATÁN

Please enter your comment!
Please enter your name here