Diákonu nain-tolu (3) hosi Kongregasaun Salezianu simu ordenasaun saserdotál hosi Dom Virgílio do Carmo da Silva, SDB iha Igreja Parókia Maria Auxilidora, Comoro, Dili, sábadu (14/08). Imajen Tatoli/Francisco Sony

DILI, 14 agostu 2021 (TATOLI)- Arsebispu Arkidioseze Metropolitana Dili, Mgr. Virgílio do Carmo da Silva, SDB, sábadu ne’e, selebra ordenasaun saserdotál (priestly ordination) ba diákonu  na’in-tolu hosi Kongregasaun Salezianu.

Bibi atan na’in-tolu ne’e mak hanesan, Diákonu (Dc) António Maria José Guterres, SDB,   Dc. Celestino da Costa, SDB ho Dc. Victor da Cunha, SDB.

Diákonu nain-tolu hosi Kongregasaun Salezianu simu ordenasaun saserdotál hosi Dom Virgílio do Carmo da Silva, SDB iha Igreja Parókia Maria Auxilidora, Comoro Dili, sábadu (14/08). Imajen Tatoli/Francisco Sony

Selebrasaun liturjia ordenasaun saserdotál ne’ebé hala’o iha Igreja Parókia Maria Auxiliadora, Comoro, Dili, hetan partisipasaun másimu hosi família rasik diákonu na’in-tolu nian, amu-lulik sira, madre sira no sarani-sira no família boot Salezianu Dom Bosco Timor-Leste nian.

Diákonu hosi kongregasaun Salezianu ne’e simu ordenasaun nu’udar nai lulik hodi saran an serve Maromak no Santa Kreda nu’udar bibi-atan atu haklaken Nai Nia liafuan.

Arsebispu Arkidioseze Metropolitana Dili, Mgr. Virgílio do Carmo, SDB  iha nia omilia hateten, haktuir Saun Paulo lai-fuan dehan, buat hotu lori di’ak ba sira ne’ebé hadomi Maromak, no sira ne’ebé Maromak bolu tuir Nia hakarak, basá sira ne’ebé Nia hatene, hatene nanis ona, Nia fó ona espíritu atu sai Oan Mane nia ilas, atu nia sai oan boot liu iha maun-alin barak sira leet.

Diákonu nain-tolu (3) hosi Kongregasaun Salezianu ne’ebé simu ordenasaun saserdotál, sábadu (14/08). Imajen/ Espesiál

“Loos duni iha Kristu Maromak futar Santu, ita hotu mesak Amu-lulik, maibé lulik loos ne’e ida, nune’e Jesus hili eskolante balu atu dezempeña sira-nia aan atu haknaar aan iha uma kreda hodi hala’o Maromak Nia lia-fuan, nune’e, hanesan motu ne’ebé imi tau dehan ba sira ha’u konsagra ha’u nia aan, ne’e katak halo santu, halulik imi-nia aan saran ba Maromak no maluk sira,” Dom Virgílio do Carmo da Silva, hateten.

Arsebispu hosi kongregasaun Salezianu ne’e  mós husu ba Amu-lulik foun na’in tolu katak, ordenasaun saserdotál amu-lulik foun na’in tolu refere monu loos iha loron festa solinaridade asumsaun Maria ka dormisaun Maria, tanba loron ida-ne’e mós importante tebes ba Amu-lulik na’in tolu atu konsagra aan hanesan inan ne’ebé domin nain.

Ritu ordenasaun ida-ne’e sagradu no sei lori amu-lulik foun na’in-tolu ba moris foun ida no sei haketak aan hosi buat hotu hodi sai ida de’it ho Kristu, hariku ho identidade foun ema sagradu ninian.

“Imi-nia misaun amu-lulik nian la’ós simplesmente títulu jurídiku ida no la’ós konsiste de’it ho knaar ida imi halo iha uma kreda. Dala barak ema hanoin dehan ita ne’e funsionáriu uma kreda nian, maibé lae, nune’e ordenasaun ida-ne’e kbiit  poder ida hosi Maromak nian mai hosi Lalehan personal Kristu tanba ne’e imi sai instrumentu Kristu nian iha imi-nia hahalok moris tomak,” Dom Virgílio do Carmo da Silva hateten.

Dom Virgílio husu ba amu-lulik na’in tolu ne’e atu haknaar amu-lulik nian ne’ebé ohin sira simu ona ba oin hala’o ho di’ak tuir Dom Bosco nia hakarak no Dom Bosco nia doutrina.

Antes ramata misa reprezentante Amu-lulik foun na’in tolu, Pe. Celestino da Costa, SDB, hato’o agradese ua’in tebes ba Maromak no família tomak ne’ebé fó liberdade ba sira hili dalan sai bibi atan hodi haklaken Maromak nia liafuan.

“Ami na’in tolu agradese ba kongregasaun Salezianu, liuliu ba Padre Provinsiál, Vigáriu no konselleiru sira hotu ne’ebé akompaña ami hahú hosi ami-nia formasaun to’o mai ohin, ami bele hamriik iha altar Santu ida-ne’e, maibé ami na’in-tolu presiza nafatin ita hotu nia orasaun akompaña nafatin ami iha knaar ne’ebé ami simu daudaun ne’e,” amu Celestino da Costa haktuir.

Amu-lulik foun na’in tolu ne’e; na’in-ida hosi Munisípiu Lautem, na’in-ida hosi Baucau no na’in-ida seluk hosi Rejiaun Administrativa Espesiál Oé-Cusse Ambeno (RAEOA).

Jornalista   : Arminda Fonseca

Editór        : Francisco Simões

HAKEREK NO HATÁN

Please enter your comment!
Please enter your name here