Sentru Formasaun UFD hahú formasaun, iha salaun sentru formasaun, sesta (13/08). Imajen TATOLI/Natalino Belo

BAUCAU, 13 agostu 2021 (TATOLI)–Sentru formasaun Unidade Feto ba Dezenvolvementu (UFD) hahú hikas atividade formasaun, hafoin termina períodu serka sanitária iha Baucau.

Responsável másimu no Diretór programa UFD, Lourenço Zacarias Pinto, hateten, formandu sira tuir formasaun durante fulan-lima.

Responsável másimu no Diretór programa UFD, Lourenço Zacarias Pinto. Imajen TATOLI/Natalino Belo

“Ba tinan ne’e, formandu rejistadu hamutuk 87, kompostu hosi mane 28 no feto 59, ne’ebé rejistu hahú iha fulan-dezembru to’o marsu, maibé tanba kondisaun serka sanitária mak la konsege realiza, foin ohin mak hahú abertura formasaun ba períodu datoluk,” Diretór programa informa iha sentru UFD, Villa nova, sesta ne’e.

Sentru formasaun ne’e iha programa lima hanesan Admistrasaun, Komputador, Lingua inglés no Portugés, Jornalismu no Leadership ho formadór lima.

Lourenço esplika, hosi benefisiáriu 87, iha formandu balun mak hili programa liu ida, kompostu hosi Admistrasaun hamutuk 23, programa jornalizmu hamutuk 21, inglés 46, portugés 13 no komputadór hamutuk 40.

Programa Admistrasaun no Jornalizmu sei frekuenta kursu durante fulan-tolu no estájiu fulan-rua, enkuantu programa lian no komputadór laiha estájiu, maibé teoria de’it, ho durasaun fulan-tolu.

“Ita-nia espransa, hafoin ramata formasaun sira bele kompleta koñesimentu teoria no prátika, atu nune’e bele kompete iha merkadu traballu iha futuru,” Lourenço akresenta.

UFD prodús ona formandu hamutuk 91, ne’ebé na’in-20 resin mak daudaun asesu ona ba kampu traballu iha institusaun Governu, Tribunál, kompañia no Oraganizaun Naun Governamentál, mídia privadu balun inklui balun nakfila sai formadór iha sentru formasaun.

“Iha 20 resin mak hetan ona serbisu, balun permanente no balun kontratadu,” Lourenço hatutan.

Jestór ne’e argumenta, sentru formasaun garante kualidade no iha esperansa bele hasa’e kapasidade joven atu kontribui ba dezenvolvementu Timor-Leste, espesiál ba munisípiu Baucau.

Períodu dahuluk tinan 2019, UFD prodús formandu no atribui sertifikadu hamutuk 41, enkuantu períodu daruak tinan 2020 iha ona finalista hamutuk na’in-50.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here