Embaixadór Indonézia iha Timor-Leste, Sahat Sitorus, tau ai-funan iha TMP Seroja, Dili, hodi komemora loron restaurasaun independénsia Repúblika Indonézia ba-dala 76 (17 agostu 1945-17 agostu 2021). Imajen Tatoli/Francisco Sony

DILI, 13 agostu 2021 (TATOLI)– Restu mortais militár Indonézia sira-nian ka  ABRI (Angkatan Bersenjata Republik Indonesia) ne’ebé mate no haloot iha jardín eroi sira ka TMP (Taman Makan Pahlawan) iha territóriu Timor-Leste sei lori hotu mai haloot ho di’ak iha TMP Baucau ho TMP Seroja, Dili.

Embaixadór Indonézia iha Timor-Leste, Sahat Sitorus, husu ba Governu Timor – Leste no autoridade lokál sira atu servisu hamutuk no iha kooperasaun di’ak atu foti restu mortais militár Indonézia sira iha teritoriu nasionál atu tau hamutuk iha fatin rua; TMP Kailara, Baucau ho TMP Seroja Dili.

“Ho respeita ba Governu no povu Timor-Leste, ho rekonsiliasaun ne’ebé iha ona, husu atu ita servisu hamutuk iha kooperasaun ne’ebé di’ak atu ami bele foti restu mortais militár indonézia sira durante ne’e mate hakoi iha territóriu nasionál ba tau iha fatin rua ne’ebé prepara ona hanesan iha TMP Kailara, Baucau ho TMP Seroja Dili,” Embaxadór Sahat Sitorus hateten jornalista sira iha Dili, sesta ne’e.

Diplomata Indonézia iha Timor-Leste ne’e haktuir, durante hala’o misaun iha Timor – Leste hosi 2017 to’o 2019 konsege koopera ho Governu Timor-Leste no povu hotu, nune’e muda ona militár Indonézia hirak ne’ebé mate hakoi iha Munisípiu Manatuto muda ba tau fali iha Baucau no Liquiça tau fali iha Dili. Hosi Liquiça sira hasai restu mortais hamutuk 77 no Manatuto muda ba Baucau hamutuk 22.

ABRI sira ne’ebé mate iha Timor-Leste hahú kedas hosi tinan invazaun mai Timor-Leste iha 1975 to’o 1999 ne’ebé haloot hela iha TMP Kailara, Baucau na’in-600 no iha Dili na’in-700. Hirak ne’e hotu, la sura ho restu mortais ne’ebé seidauk rekolla iha teritoriu Timor-Leste.

Jornalista   : Hortencio Sanchez

Editór        : Francisco Simões

 

HAKEREK NO HATÁN

Please enter your comment!
Please enter your name here