PA-RAEOA Arsénio Paixão Bano, hatuur fatuk-inan ba konstrusaun eskola rua iha sub-rejiaun Nitibe, sesta (13/08). Imajen Tatoli/Abílio Elo Nini

OÉ-CUSSE, 13 agostu 2021 (TATOLI)-Prezidente Autoridade Rejiaun Administrativa Espesiál Oé-Cusse Ambeno (PA-RAEOA), Arsénio Paixão Bano, sesta ne’e, hatur fatuk-inan ba konstrusaun eskola rua iha sub-rejiaun Nitibe, suku Bene-Ufe ho suku Suni-Ufe.

Notísia Relevante : PA-RAEOA hatuur fatuk-inan ba konstrusaun eskola haat

Eskola rua ne’e maka hanesan Eskola Bázika Sentrál (EBC, sigla protugés) Sta. Reliqui Citrana iha suku Bene-Ufe konstrui hosi empreza Bitimo unipesoál.Lda, ho valór kontratu $62,9959.48 no Eskola Báziku Filiál (EBF) Oé-Nunu iha suku Suni-Ufe konstrui hosi empreza Rainha-Mena unipesoál.Lda, ho valór kontratu $85,557,65.

“Autoridade RAEOA lansa-tan fasilidade edukasaun ba konstrusaun daneen iha sub-rejiaun Nitibe, fasilidade sira ne’e iha tinan hirak liubá, autoridade lokál inklui dirijente eskola sira iha Nitibe sujere atu harii eskola, no tinan ne’e autoridade konsege responde ona, parabens ba povu Nitibe tanba hetan fasilidade eskola,” Arsénio Bano  hateten iha ámbitu serimónia hatuur fatuk-inan ba konstrusaun eskola rua refere.

Autoridade ne’e fundamenta, RAEOA sei rezolve eskola barak iha sub-rejiaun Oésilo, Pasabe, Pante Makasar inklui sub-rejiaun Nitibe, tanba edukasaun planu prioridade autoridade nian.

Nia husu ba empreza sira, hamutuk ho autoridade lokál haree obra sira-ne’e, servisu ho responsabilidade no garante kualidade, tanba osan povu nian tenke gasta ba obra ho kualidade.

Jestór sub-rejiaun Nitibe, Manuel Tolan, hato’o agradese ba autoridade tanba tinan ne’e autoridade harii fasilidade eskola tolu, hanesan iha suku Ban-Afi harii Eskola Bázika Sentrál (EBC, sigla portugés) Banefmanat, no ohin lansa-tan eskola rua.

Jornalista   : Abílio Elo Nini
Editór        : Francisco Simões

HAKEREK NO HATÁN

Please enter your comment!
Please enter your name here