Estensionista na'in 42 hosi munisípiu Manatuto, Baucau, Lautém no Viqueque tuir formasaun kona-bá konservasaun agríkola, iha Viqueque, sesta (13/08/21). Imajen Tatoli/Vitorino Lopes da Costa.

VIQUEQUE, 13 agostu 2021 (TATOLI)—Ekipa hosi Ministériu Agrilultura no Peska (MAP), serbisu hamutuk ho Ajénsia Internasionál ba Ai-han (FAO sígla ingés) fó formasaun ba estensionista na’in 42 hosi munisípiu haat, kona-bá konservasaun agríkola.

Objetivu hosi formasaun ne’e, atu hasa’e koñesementu estensionista sira nian hodi halo konservasaun kona-bá rai agríkula.

Notísia relevante:BTL,E.P apresia kolaborasaun funsionáriu SAS Viqueque

Formadór hosi FAO, Claudino Ninas Nabeis, hateten formasaun ba tékniku estensionista sira atu oinsa halo konservasaun rai no la presiza tán uza tratór hodi fila-rai.

“Ami la’ós fó formasaun de’it, maibé ami lori sira ba kampu hodi haree direta atividade konservasaun nian,” Claudino Ninas Nibeis hateten ba jornalista Agência Tatoli, iha edifísiu serbisu Agrikultura Munisípiu Viqueque, Beloi, sesta ne’e.

Konservasaun agríkola ne’e iha tipu tolu ne’ebé sai hanesan preokupasaun ba povu agrikultór sira no presija buka atu fó solusaun.

Tipu tolu ne’e hanesan rai la presiza atu fila, la presiza sunu rai no kuda lekuma hodi konserva rai.

Entaun prinsipiu tolu ne’e, bele ajuda tebes-tebes povu agrikultór sira, iha munisípiu Viqueque no implementa ona iha tinan rua, ba rai ektare 180, no konsege hasa’e produsaun hare.

Estensionista Viqueque, Aniceto Gusmão, haktuir formasaun ne’e fó duni benefísiu ba estensionista sira tanba bele hasa’e koñesimentu ba implementasaun tékniku foun, ne’ebé hetan hosi ekipa formadór MAP no FAO.

Formasaun ne’ebé hala’o iha salaun serbisu MAP durante loron tolu, hahú hosi kuarta to’o sesta ne’e.

Partisipa iha formasaun ne’e estensionista hosi munisípiu haat, Manatuto na’in-ualu, Baucau na’in-hitu, Lautém na’in-sia no Viqueque na’in 18 ho totál na’in 42.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here