Monumentu Viqueque. Imajen/Wikipedia.

VIQUEQUE, 13 agostu 2021 (TATOLI)—Estudante Ensinu Sekundáriu Katólika, Santa Magdalena de Canosa Ossu, postu adiministrativu Ossu, husi idade 18 ba leten hamutuk na’in 63, simu ona vasina AstraZenca doze dahuluk no profesór na’in 28 kompleta ona vasina doze daruak.

“Estudante idade 18 ba leten mak simu ona vasina, maibé hosi  idade 17 mai karaik seidauk simu. Bainhira Governu lori ona vasina P’fizer mai, entaun estudante-sira  idade ki’ik bele simu ona,” Diretora eskola, Irmã Célia Freitas, hateten ba jornalista Agência Tatoli, via telefónika, sesta ne’e.

Notísia relevante:COVID-19, vasina iha Viqueque to’o ona 68%

Antes ne’e bainhira parte eskola foti desizaun hodi re-ativa ensinu prezensiál, iha estudante hamutuk na’in-lima  mak pozitivu COVID-19, maibé agora rekopera ona, no  partisipa aula normál.

“Ami mantein kumpre hodi halo prevensaun ba COVID-19, hanesan uza máskara, fase liman, distánsia sosiál no halo teste ba temperature estudante sira nian molok tamas ala-de-aula,” diretora ne’e subliña.

Totál estudante hosi eskola ne’e hamutuk 300-resin no totál profesór na’in 27.

Nune’e mós diretór serbisu edukasaun munisípiu Viqueque, Emídio Amaral, informa serbisu edukasaun munisipál fó ona orientasaun ba eskola-sira hosi fulan agostu to’o setembru atu hatama naran estudante-sira ba parte saúde hodi simu vasina, nune’e hotu-hotu kontribui ba prevensaun COVID-19.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here