Prezidente Repúblika, Francisco Guterres Lú Olo fó posse embaixadora Timor-Leste ba CPLP, Marina Ribeiro Alkatiri. Imajen Tatoli/Egas Cristovão

DILI, 13 agostu 2021 (TATOLI)–Prezidente Repúblika, Francisco Guterres  “Lú Olo”, sesta ne’e, iha Palásiu Prezidensiál, Dili,  fó pose ba embaixadór dezignadu sira no subliña katak sira hotu tenke iha koñesimentu ne’ebé kle’an iha área  multilaterál.

“Haree ba dezafiu sira-ne’ebé Timor-Leste enfrenta daudaun, ita-nia embaixadór sira tenke iha koñesimentu ida-ne’ebé kle’an iha área  multilaterál no hatene oinsá dada liután investimentu hosi rai-li’ur atu ajuda haburas ita-nia ekonomia,” Prezidente Repúblika Francisco Guterres “Lú Olo” hateten iha ámbitu serimónia pose ba embaixadór dezignadu sira.

Tuir Xefe Estadu katak Timor-Leste sei dependénsia ho mina-rai no gás naturál no sei nafatin dezafiu ida ba Timor-Leste. Nune’e presiza halo diversifikasaun.

“Atu  hamenus  ita-nia dependénsia boot husi idrokarbonetu (mina-rai no gás naturál),  ita presiza haree oinsá diversifika ita-nia ekonomia.  Ne’e mak dezafiu ida-ne’ebé ita hotu-hotu hatene no atu hatán ba ida-ne’e, importante ba embaixadór sira hatene  oinsá  halo diplomasia ekonómika. Nu’udar ema, problema sira bele sobu ita ka halo ita haforsa liután ita-nia kapasidade  atu sai kompetetivu no efetivu liu,” Lú Olo tenik.

Bainhira hili demokrasia, PR akresenta, ida-ne’e fó-sai  mós parte importante ida hosi luta  rasik tanba uluk kedas Timor-Leste defende  soberania nasionál,  independénsia,  dignidade umana no  respeitu ba direitu umanu.

Dezafiu seluk, Lú Olo hateten, Timor-Leste labele hasees-an hosi rejiaun no rai sira seluk. Tanba ne’e, embaixadór sira presiza duni hatene didi’ak  oinsá  reprezenta país ida-ne’e, tuir polítika internasionál no rejionál  ne’ebé hatuur ho respeitu ba malu, pás, ekilíbriu, independénsia no kooperasaun.

Haree ba kotuk,  Lú Olo haktuir, laiha tradisaun imigra ka sai ba rai-li’ur. Maibé,  timor-oan barak tebes  ona mak sai ona no  servisu   iha rai-li’ur ohin loron. Situasaun ida-ne’e sai dezafiu boot ida ba reprezentasaun  diplomátika sira tanba embaixadór sira presiza haree oinsá fó asisténsia   ba traballadór sira-ne’e.

Nia dehan, foin daudaun ne’e  akontese iha Luanda, Konferénsia Xefe Estadu no Governu  CPLP nian ba dala XIII. Timor-oan ida mak foin kaer dahuluk  knaar nu’udar Sekretáriu Ezekutivu CPLP. Ho rai hirak ne’ebé halo parte komunidade multilaterál ida-ne’e, entaun Timor-Leste iha relasaun   privilejiadu no úniku, ne’ebé tama tiha ona  iha Konstituisaun ne’e.

Embaixadóra Marina Ribeiro Alkatiri,   kuadru  ida ne’ebé halo parte servisu  diplomasia  rezisténsia-nian durante tempu tomak  luta  libertasaun nasionál. Embaixadora dahuluk  rezidente pós-restaurasaun independénsia, iha Moçambique, no naun-rezidente, iha Ángola no África do Sul.  Koordenadora   Gabinete  Apoiu ba Prezidénsia Rotativa CPLP lidera hosi Timor-Leste.

Husi 2014 to’o 2016 CPLP  dada atensaun maka’as  tanba rai membru  sira iha rekursu  ho valór boot tebes no hamutuk iha patrimóniu  ida oin seluk liu. Karaterístika hirak-ne’e mak halo CPLP afirma-an liután iha mundu, no nune’e, koletivu ida-ne’e  presiza haree oinsá  hasa’e no hakle’an liután ninia knaar. Estadu-membru ida-idak tenke asume ninia responsabilidade iha ámbitu CPLP no ho koletivu ida-ne’e ninia relasaun internasionál.

“Nune’e, ita-boot ninia misaun mak haree oinsá  reforsa papél ita-nia país nian iha ámbitu  komunidade ida-ne’e nian  no mós iha relasaun iha área diplomasia mundiál,” Lú Olo hateten.

Embaixadór Gregório de Sousa, iha formasaun  akadémika no esperiénsia relevante iha kuadru relasaun internasionál. Hala’o  ona knaar nu’udar embaixadór iha Brazil, país membru CPLP mós. Kaer knaar iha II Governu Tranzisaun  Nasaun Unida no mós iha I, II no III Governu Konstitusionál asume knaar nu’udar  Xefe  Kaza Sívil  bainhira Presidente Repúblika mak José da Ramos-Horta.

Durante luta  libertasaun nasionál  embaixadór ne’e hatene tiha ona ezijénsia sira hosi servisu diplomátiku. Sei hala’o  knaar iha Repúblika Koreia, rai ida-ne’ebé Timor-Leste  iha relasaun kooperasaun di’ak  tebes. Timor-oan barak ona mak  hela no servisu iha Koreia.

Xefe Estadu ho laran metin katak embaixadór sei fó atensaun espesiál ba problema delikadu sira ne’ebé traballadór sira hasoru enkuantu  buka hetan osan liuhusi  servisu iha rai ne’ebé la’ós sira nia moris-fatin.

Embaixadóra Olandina Caeiro Alves, iha experiénsia naruk ho knaar oin-oin iha  área Administrasaun Públika. Nune’e,  hatene mós  dezafiu sira-ne’ebé funsaun públika hasoru. Hori uluk hala’o knaar relevante iha área rekonsiliasaun.  Foin hotu ninia knaar  nu’udar embaixadóra iha Malázia no ba oin sei  hasoru nafatin  dezafiu hanesan,  kona-ba integrasaun iha rejiaun, katak,  tenke esforsa-an nafatin atu Timor-Leste tama ba  ASEAN.

“Ha’u  laran metin katak  ninia  experiénsia profisionál,  hamutuk  ho  ninia kualidade pesoál gosta ajuda ema, sei lori embaixadóra ne’e halo servisu diplomátiku di’ak ida, iha  Repúblika Sosialista  Vietname, ne’ebé sei fó benefísiu ba ita-nia país,” Lú Olo hateten.

Embaixadóra Lurdes Bessa, ho otas foin-sa’e, lori povu Timor-Leste nia mehi ba ukun rasik-an  ba país oioin enkuantu moris iha rai-li’ur. Hala’o maka’as atividade partidária ho mós  knaar  nu’udar deputada.  Prezide bankada partidu nian iha Parlamentu Nasionál no foin lalais ne’e, sai  membru  Governu ho responsabilidade ba  edukasaun,  área ida-ne’ebé delikada no importante tebes.

“Iha tinan tolu ikus nia-laran, ha’u koñese di’ak liután señora Lurdes Bessa ninia kualidade tanba servisu nu’udar Asesora ba Prezidente Repúblika. Hosi  ohin ba oin, sei asume kargu nu’udar Embaixadóra Timor-Leste nian ba Konfederasaun Suisa. Embaixadóra hatene katak ita-nia país kandidata ona atu sai membru Konsellu Direitu Umanu iha Organizasaun  Nasaun Unida ba períodu 2024 – 2026. Liuhosi ita-boot, ita-nia país sei reafirma iha komunidade  internasionál nia leet, nu’udar Estadu Demokrátiku ida-ne’ebé respeita direitu umanu,” Lú Olo tenik.

PR Lú Olo laran metin  tebes katak embaixadór ida-idak sei haka’as oinsá de’it atu halo servisu di’ak liu  ba nasaun ida-ne’e.

Estadu Timor-Leste liu-liu, Prezidente Repúblika, konfia iha  embaixadór sira ida-idak  nia mandatu atu reprezenta  Timor-Leste. Tempu ohin loron nian la’o lalais  tebes no dala ruma,  akontese mudansa maka’as liu  iha planu relasaun  internasionál no rejionál. Estadu Timor-Leste fó fiar ba ninia diplomata sira atu haree oinsá hatán ba mudansa sira-ne’e.

“Onra mak ha’u prezide serimónia tomada de posse ba  exelénsia sira nu’udar embaixadór foun  ba ita-nia país. Ita-boot sira sei hala’o knaar  iha ámbitu bilaterál no multilaterál. Hosi embaixadór  sira simu pose, ohin, na’in rua sei asume funsaun iha Ázia, embaixadóra ida  iha área bilaterál no multilaterál no embaixadóra ida seluk iha ámbitu multilaterál,” Lú Olo hateten.

Ministra Negósiu Estranjeiru no Kooperasaun, Adaljiza Albertina Xavier Reis Magno. Imajen TATOLI/Egas Cristóvão

Iha fatin hanesan Ministra Negósiu Estranjeiru no Kooperasaun (MNEK), Adalzija Albertina Xavier Reis Magno, informa parese iha fulan-setembru mak embaixadór bele arranka hodi hala’o sira-nia knar diplomata nian

“Maibé aviaun ne’e depende no depende mós ba Sala Situasaun Sentru Integradu Jestaun Krize (SS-SIJK) nian. Pedidu ba aviaun sempre iha, maibé SIJK mós sei haree ba situasaun iha rai-laran. Sira so autoriza semana rua dala ida ka fulan ida dala ida tanba ne’e bainhira aviaun sai depende ba autorizasaun SIJK,” Ministra Adalzija Magno haktuir ba jornalista sira.

Prezidente Repúblika, Francisco Guterres “Lú Olo” fó tomada  pose ba embaixadór na’in-haat   hanesan Gregório de Sousa ba Korea do Súl, Embaixadóra Maria Olandina Caeiro ba Vietname, Embaixadóra Marina Ribeiro Alkatiri ba CPLP ho Embaixadóra Lourdes Bessa ba Jenebra.

Jornalista            : Osória Marques

Editór                 : Francisco Simões

HAKEREK NO HATÁN

Please enter your comment!
Please enter your name here