Prezidente CCI-TL, Oscar Lima. Imajen TATOLI/Antónia Gusmão

DILI, 13 agostu 2021 (TATOLI)–Prezidente Kámara Komérsiu Indústria Timor-Leste (CCI-TL), Oscar Lima, apresia desizaun Governu altera lejizlasaun hodi permite empreza nasionál ezekuta konstrusaun sivil Estadu ho valór millaun $7,5, tanba ne’e iha tempu besik sei koordena ho Ministériu Obra Públika (MOP) hodi define empreza ne’ebé bele kaer obra.

“Ha’u hato’o parabéns ba Primeiru-Ministru no membru Governu tomak, prinsipál ba MOP, tanba foti desizaun di’ak no emprezáriu barak sei kontente, la’ós emprezáriu hotu tenke hetan klasifikasaun A, maibé ami sei limita klasifikasaun. Lakleur tan ami sei asina akordu ho MOP hodi fó sasukat ba empreza ne’ebé tenke kaer obra tuir klasifikasaun, ba hirak ne’ebé laiha kapasidade atu kaer obra ne’e labele fó,” Prezidente CCI-TL hateten iha ninia knaar fatin, sesta ne’e.

Notísia relevante: Alterasaun lejizlasaun permite empreza nasionál halo konstrusaun sivil millaun $7,5

Lejizlasaun ne’e kona-ba alterasaun dahuluk ba Dekretu-Lei númeru 27/2010, loron 22 dezembru, ne’ebé aprova ona Rejime Jurídiku Sertifikasaun no Inskrisaun Empreza Konstrusaun Sivíl no Konsultória Téknika Sivíl.

Tuir emprezáriu timor-oan ne’e, antes ne’e ekipa CCI-TL hasoru malu ho Primeiru-Ministru, Ministru Obra Públika no Ministru Finansa hodi hato’o preokupasaun empreza nasionál tanba antes ne’e lejizlasaun limita kaer obra Estadu, ne’ebé bainhira kustu obra ne’e millaun $7,5, empreza nasionál tenke halo konsórsiu ho empreza internasionál, maibé ho alterasaun lei ne’e loke ona oportunidade ba timor-oan sira atu kompete.

“Kuandu millaun $7,5 mai kraik mak fó kompeténsia ba emprezáriu nasionál, ne’e benefísiu ida tanba osan ne’e bainhira manán karik, automátikamente hela iha Timór no sei la bá rai-li’ur, maibé kuandu fó tomak ba empreza estranjeiru, entaun osan ne’e sai hotu ba li’ur no oituan tebes mak iha Timór,” nia hatutan.

Biban ne’e, Oscar Lima husu ba emprezáriu sira atu halo esforsu hodi Governu bele fó fiar ba setór privadu nasionál no tenke garante kualidade.

“Emprezáriu hotu tenke buka halo obra ho kualidade di’ak, ema estranjeiru bele halo di’ak tanba saida ita-nian ladi’ak. Ita mós tenke kontrata ema ne’ebé mak profisionál atubele ajuda no tékniku sira kuandu presiza bolu hosi estranjeiru. Maibé iha konfiasa katak emprezáriu timor-oan balun iha kapasidade kaer obra ho valór millaun $7,5 liu,” nia dehan.

Nia husu obra sira tenke fó benefísiu ba Estadu no povu, nune’e korresponde ho fiar hosi Governu no bainhira halo serbisu tuir kalendáriu ne’ebé define ona.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here