Arsebispu ba Arkedioseze Metropolitana Dili, Don Virgílio do Carmo da Silva. Imajen TATOLI/Egas Cristóvão

DILI, 13 agostu 2021 (TATOLI)—Arsebispu Arkedioseze Metropolitana Dili, Don Virgílio do Carmo da Silva, iha sesta ne’e hasoru Primeiru-Ministru (PM), Taur Matan Ruak, hodi partilla kona-ba inisiativa harii Universidade Katólika iha Balide.

“Ministériu Ensinu Superiór Siénsia no Kultura (MSKK) inklui ekipa instaladora sira kontinua halo kontaktu kona-ba pontu ne’ebé la klaru, hanesan buat ruma falta, ne’ebé halo ona komunikasaun ba dala-tolu ona, ministériu bolu ekipa instaladora no buat hotu la’o di’ak, ne’ebé semana rua tan ami halo aprezentasaun programa tomak ba ministériu no molok sira ba haree lokál harii universidade,” Don Virgílio informa hafoin hasoru malu ho Xefe Governu, iha Rezidénsia Ofisiál Farol.

Notísia relevante: Dioseze Dili entrega dokumentu ba MESSK molok loke universidade katólika

Inisiativa harii universidade katólika desde tinan 2002, desde tempu Don Carlos, ne’ebé forma ekipa ida atu halo estudu viablidade maibé paradu ona hafoin Don Ricardo hahú fali no durante tinan barak nia laran kontinua halo aprosimasaun liuhosi dalan oinoin no ikus mai iha desizaun hodi harii.

Hafoin partilla inisiativa ne’e, Xefe Governu apresia tebes no komprometidu apoia prosesu tomak.

Antes ne’e, Arsebispu Arkidioseze Metropolitana Dili entrega dokumentu ba MESSK hodi analiza molok loke universidade katólika iha Dili.

Kona-ba edifísiu, daudaun ne’e preparasaun atinje ona 80%, ne’ebé hanesan edifísiu antigu ida maka halo reabilitasaun no Dioseze Dili mak sai na’in ba propriedade sira.

Universidade ne’e sei hahú ho Fakuldade sosiál kompostu hosi edukasaun, lian no arte, enkuantu fakuldade exata kompostu hosi siénsia no umana, ne’ebé kuandu realiza ona sei loke tan fakuldade siénsia médika no agríkola.

Aleinde ne’e, iha ona ema na’in-50 mak kompromete serví iha universidade ne’e, ne’ebé sira hotu grau doutoramentu no mestradu.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here