Koordenadór SERVE Baucau, Raul Sanches Lajes. Imajen TATOLI/Natalino Belo

BAUCAU, 12 agostu 2021 (TATOLI)—Koordenadór Servisu Rejistrasaun no Verifikasaun Emprezariál (SERVE) Baucau, Raul Sanches Lajes, hateten, fulan-jullu nia laran rekolla reseita $4.000 resin.

“Hafoin hakotu serka sanitária iha Baucau, hosi loron 12 to’o fulan-jullu nia rohan ami konsege rekolla reseita hamutuk $4.055,” Koordenadór SERVE Baucau informa ba Agência TATOLI, iha ninia knaar fatin, Villa nova, kinta ne’e.

SERVE rekolla reseita hosi kompañia konstrusaun, negosiante, kios no loja inklui transporte públiku ne’ebé hala’o atividade negósiu maibé iha kompañia balun mak hato’o kestaun laiha rendimentu.

Durante períodu serka sanitária iha fulan-lima nia laran, SERVE halo atendimentu rejistu liuhosi meiu online, bazeia ba Dekretu Prezidente Repúblika númeru 6/2021 no Dekretu Governu númeru 15/2021, ne’ebé la permite atribuisaun dokumentu direta tanba iha situasaun serka sanitária no konfinamentu domisiliáriu obrigatóriu.

“Hafoin hakotu serka sanitária, SERVE foin halo xamada ba emprezáriu sira atu mai foti dokumentu orijinál. Baucau maski hasoru dezafiu maibé atividade ekonomia la’o ho normál no númeru emprezáriu aumenta,” Raul akresenta.

Hosi loron 12 jullu to’o agora, SERVE Baucau rejista kompañfoun 70.

Ba kestaun ne’e, Koordenadór ne’e husu emprezáriu Baucau-oan sira atu hahú negósiu kiik no kontinua rejista iha servisu ne’e tanba rekezitu hahú redús inklui durasaun tempu atu hasai lisensa, ne’ebé antes ne’e ho prosesu kleur.

Nia dehan, SERVE nafatin loke odomatan ba kompañia sira iha Baucau atu trata dokumentu ruma inklui kolabora ho entidade relevante sira hodi fasilita kréditu ba emprezáriu sira.

“Ami nafatin sai liman ain Ministériu Koordenadór Asuntu Ekonómiku (MKAE), Institutu Apoiu Dezenvolvementu Emprezárial (IADE), no Banku Nasionál Komérsiu Timor-Leste (BNCTL, sigla Portugés) atu hetan kréditu,” Raul subliña.

Tuir dadus, SERVE Baucau hahú hosi tinan 2018 to’o agora konsege rejista kompañia foun hamutuk 656, renovasaun hamutuk 769 inklui alterasaun ka aumenta atividade hamutuk 754.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here