Ilustrasaun ema tuir formasaun. Imajen/Espesiál

DILI12 agostu 2021 (TATOLI)–Diretór Sentru Formasaun Vokasionál Juventude Camea, Cirilo Luís da Silva, hateten, durante ne’e sentru fó formasaun ba partisipante sira atu sai formadór.

Formandu sira mai hosi instituisaun Estadu, sentru formasaun rejistradu no akreditadu, no Organizasaun Naun Govermentál (ONG) sira, ne’ebé iha tinan ne’e hamutuk iha partisipante 50, ba área administrasaun 20 no otelária 30 no hosi númeru ne’e formandu sira mai hosi estudante no joven ein jerál.

“Aminia formasaun ho objetivu atu hasa’e koñesimentu no abilidade hodi sai formadór ne’ebé profisionál, ho nune’e bele hanorin filafali joven sira,” Diretór sentru informa ba Agência TATOLI, iha ninia knaar fatin, kinta ne’e.

Matéria ne’ebé hanorin ba formandu sira hanesan metodologia hodi hanorin kona-ba prátika no teoria.

“Kona-ba atu prepara planu diskusaun no planu aula, oinsá hasoru formandu sira ne’ebé mai ho karaktér la hanesan, tanba ema-nia maneira mai aprende la hanesan, ho ida-ne’e ita buka akumula ema hodi tama hamutuk iha métodu ida, atu sira bele aprende ho di’ak no ida seluk bele halo asesmentu no fó ezame ba estudante, hanesan atu dezenvolve matéria no hamriik iha oin hodi esplika, buat hirak ne’e mak ita fasilita ba sira,” nia esplika.

Iha tinan ne’e, tanba situasaun pandemia, halo atividade hanesan prosesu aprendizajen paradu, maibé iha fulan-jullu, sentru ne’e hetan despaixu katak bele reativa ona atividade prosesu aprendizajen, ho nune’e sentru hahú atividade iha fulan-agostu.

“Aminia atividade formasaun hahú ona iha segunda (09/08), maibé to’o agora formandu sira seidauk mai hotu, tanba sira hela iha múnisípiu no daudaun ami tenta nafatin kontaktu sira atu buka meiu tuir formasaun, tanba ne’e ami fó tempu formandu sira to’o sesta no hein rezultadu iha segunda semana oin, atu hatene sira kontinua ka lae, nune’e bele troka ema seluk” nia hatutan.

Antes ne’e, sentru formasaun ne’e asina ona akordu ho Governu atu hetan finansiamentu, tanba ne’e dadús ne’ebé iha tenke mantein.

“Ezemplu, dadús ne’ebé sentru ne’e hatama iha ema na’in50, tanba ne’e bainhira submete relatóriu tenke iha ema na’in50, se la to’o 50 entaun bele prejudika sentru elabora relatóriu,” nia esplika.

Maski reativa ona formasaun, sentru ne’e nafatin kumpre regraa hosi Ministériu Saúde (MS) no Organizasaun Mundiál Saúde (OMS).

“Iha sentru ne’e, ami nafatin kumpre regra saúde no ami aviza ona ba formandu sira, bainhira filafali mai tuir formasaun, hotu-hotu tenke hetan vasina kompleta no nafatin uza maskára no halo distansiamentu fíziku,” Diretór sentru tenik.

Ho nune’e, totál formadór iha sentru ne’e hamutuk 11 no formadór sira mai ho esperiénsia iha kada área.

Sentru Formasaun ne’e harii hosi Governu Noerwega, liuhosi projetu Norwegian Refugee Council (NRC) iha tinan 2008 no hetan akreditasaun hosi Institutu Nasionál Dezenvolvimentu Mão de Obra (INDMO) iha tinan 2012, ho ninia objetivu atu fó oportunidade ba joven sira hodi hasa’e koñesimentu no abilidade hodi kompete iha merkadu nasionál no internasionál.

Área formasaun iha sentru ne’e maka hanesan administrasaun, ospitalidade sertifikadu I, II, no sertifikadu III ba formasaun no avaliasaun, ne’ebé área ne’e foku ba ema atu sai formadór ou asisténsia formadór.

Hosi tinan 2008 to’o 2021, sentru ne’e prodús ona formandu hamutuk 5.000-resin no hosi númeru ne’e, ema 65% mak hetan ona serbisu iha instituisaun Governu, kompañia privada no ONG, no balun serbisu iha Koreia, Austrália, no Inglatera.

Jornalista : Nelia Fernandes

Editora     : Julia Chatarina

HAKEREK NO HATÁN

Please enter your comment!
Please enter your name here