Mapa RAEOA. Imajen/IPG Timor-Leste

OÉ-CUSSE, 12 agostu 2021 (TATOLI)-Jestór sub-rejiaun Pante Makasar, Rejiaun Administrativu Espesiál Oé-Cusse Ambeno (RAEOA), Eurico Bobo, sujere ba Ministériu Administrasaun Estatál (MAE) atu envolve autoridade lokal sira halo fiskalizasaun ba atividade Programa Nasionál Dezenvolvimentu Suku (PNDS) atu bele garante kualidade servisu no transparénsia ezekusaun servisu.

Notísia Relevante : Jestór sub-rejiaun Oésilo sujere aumenta orsamentu ba PNDS

 “Ami autoridade lokál la-involve, tanba ne’e ami propoin sei karik jestór xefe suku no aldeia sai hanesan uma na’in ba suku, entaun implementasaun projetu sira hosi PNDS tuir loloos envolve mós ami iha prosesu fiskalizasaun, tanba uza osan Estadu,” Eurico Babo hateten ba Agência Tatoli iha Oé-Cusse, foin lalais ne’e.

Nia hatete, implementasaun PNDS hala’o iha sub-rejiaun Pante Makasar maka perfurasaun bee-moos komunidade balu uza ona no ba reabilitasaun sede suku iha tinan ne’e suku (8) sai alvu hotu.

Autoridade Pante Makasar ne’e hateten kooperasaun autoridade sub-rejionál Pante Makasar ho fasilitadór PNDS sira, ladún di’ak tanba xefe suku sira pasiva de’it, tanba la-involve direita iha fiskalizasaun  no laiha konsultasaun ho autoridade sira bainhira konstrui obra iha baze.

Fasilitadór PNDS sub-rejiaun Pante Makasar, Albino R. da Crus Salu, hateten, hanesan fasilitadór PNDS sub-rejiaun Pante Makasar aseita tebes ba programa PNDS tanba mai ho nia prinsípiu ne’ebé klaru hanesan redús pobreza liuhosi harii infrastrutura bázika no komunidade mak sei deside, jere rasik, uza no tau matan rasik ba obra ne’ebé halo konstrui ona.

Fundus hosi Reziliénsia Komunitária no Rekuperasaun Ekonomia (RKRE) faze primeiru uza ba konstrusaun bee-moos iha suku ualu (8) iha sub-rejiaun Pante Makasar maka hanesan, iha suku Naimeco iha aldeia Bakui konstrui sistema perfurasaun bee-moos ho kustu $32,278,55, iha suku Taiboko, aldeia Hauboni konstrui bee-moos sistema gravitasaun kustu $32,215,87, iha suku Lalisuk konstrui iha aldeia Banoco sistema perfurasaun ho kustu $29,314,63.

Iha suku Nipane iha aldeia Bausiu konstrui sistema perfurasaun bee-moos kustu $29,255,32, iha suku Bobokase, aldeia Bihala konstrui sistema perfurasaun bee-moos kustu $29,240,07, iha suku Cunha, aldeia Noeninen konstrui sistema gravitasaun bee-moos kustu $29,129,07, iha suku Lifau, aldeia Nefobai konstrui sistema perfurasaun bee-moos kustu $32,036,87, iha suku Costa, aldeia Kutete konstrui sistema gravitasaun bee-moos kustu $32,614,48.

Fundus ba infraestrutura reabilitasaun sede suku iha tinan 2021, maka reabilitasaun Sede Suku Costa ho kustu $14,311.57, reabilitasaun Sede Suku Lifau ho kustu $12,771.49, reabilitasaun Sede Suku Niaapani ho kustu $12,747.44, reabilitasaun Sede Suku Cunha ho kustu $10,855.67, reabilitasaun Sede Suku Lalisuk  ho kutstu $11,367.69, reabilitasaun Sede Suku Naimeco ho kustu $14,173.29, reabilitasaun Sede Suku Bobokase ho kusti $12,772.49 no reabilitasaun Sede Suku Taiboko ho kustu $14,247.44,

Xefe suku Naimeco, Marcos Liu Abi, hatete molok eleitu nu’udár xefe suku programa PNDS la’o tiha ona ba implementasaun infraestrutura lokál ba komunidade sira iha baze.

“Iha suku Naimeco reabilitasaun Sede Suku agora progresu atinje ona 75% tanba tinan lima kondisaun aat ona, nune’e tulun hosi PNDS bele apoiu fundus $14.145 nune’e jestaun maka maneja rasik fundus ne’e ba reabilitasaun bazeia BoQ ne’ebé PNDS trasa ona,” Marcos Liu Abi hateten.

Perfurasaun bee-moos konstrui iha aldeia Baqui fó benefisia ba uma-kain 400, no mós reabilitasaun bee-moos iha aldeia Bonemese fó benefisia ba populasaun 963.

Xefe suku Taiboko Joaquin Tafin, hateten PNDS tama iha suku Taiboko iha projetu rua (2) mka hanesan sistema gravitasaun perfurasaun bee-moos iha aldeia Hauboni no reabilitasaun sede suku.

“Kanalizasaun sistema gravitasaun perfurasaun bee-moos hetan ona inaugurasaun hosi Prezidente Autoridade, bee-moos ne’e fó benefisiu ba uma-kain 256 ho populasaun 892 no reabilitasaun Sede Suku prosesu konstrusaun la’o hela agora atinje ona 40% ho nia montante orsamentu rihun $14-resin,” Joaquin Tafin informa.

Nu’udár autoridade lokál iha suku Taboko, senti la-satisfás tanba ekipa sira hosi PNDS laiha transparénsia ba Planta no Kadernu enkargu (BoQ) tanba osan ne’e PNDS  rasik mak jere no autoridade hatene osan ne’e nia númeru maibé gastu ne’e autoridade lokál laiha koñesimentu.

Xefe suku Costa, Aleixo Abi, sujere presiza aumenta obra ba implementasaun infraestrutura bázika, tanba iha suku Costa área luan, balu iha vila no balu sei kontinua izoladu iha foho hanesan Kutete, Lakufoan ho Oétfo.

“Suku Costa hetan obra rua hosi PNDS maka hanesan, kanalizasaun bee-moos iha bairru Kutete no reabilitasaun sede suku, ami sujere sei bele aumenta programa implementasaun infraestrutura bázika iha aldeia sira ne’ebé sei kontinua izoladu, tanba suku Costa área luan, balu seidauk asesu liña eletrisidade,” nia tenik.

Populasaun iha sub-rejiaun Pante Makasar hamutuk 45.466, kompostu hosi suku Costa populasaun 17,351, suku Lifau (3,588), suku Nipani (1,989), suku Cunha (5,991), suku Lalisuk (3,379), suku Naimeco (3,358), suku Bobokase (3,105) ho suku Taiboko  populasaun 6,705.

Jornalista            : Abílio Elo Nini

Editór                 : Francisco Simões

HAKEREK NO HATÁN

Please enter your comment!
Please enter your name here