BAUCAU, 12 agostu 2021 (TATOLI)–Prezidente Autoridade Munisípiu (PAM) Baucau no Responsável Sala Situasaun Sentru Intergradu Jestaun Krize (CIGC, sigla portugés), Olívio ‘Bou Lesa’ Freitas, hateten, CIGC Baucau presiza transporte hodi halo serbisu.
“Baucau lakohi pasivu maibé ativu, tanba ne’e presiza apoia karreta ba Sala Situasaun atu halo atendimentu, karik Ministériu Administrasaun Estatál (MAE) bele apoia karreta ruma,” PAM Baucau hateten, iha salaun apuramentu admistrasaun munisípiu Baucau, Villa nova, kinta ne’e.
Tuir Bou Lesa, tékniku sira dalabarak hasoru problema ne’ebé labele atende emediatemente tanba kestaun finansa no ekipa vijilánsia iha postu Vemasse hasoru dezafiu hanesan bee-mos.
“Maski nune’e buat hotu la’o normál, dalabarak bee ba haris mak laiha maibé hahán normál, mosu protesta kuandu buat balun la’o la tuir hakarak. Ita tenki konsiente katak progresu la la’o tuir ema individuál nia hakarak maibé tuir legalidade. Teoria no prátika presiza la’o hamutuk nune’e bele iha solusaun, tanba ne’e Baucau atu filafali ba situasaun normál presiza halo servisu maka’as no konsensionaliza komunidade hotu atubele simu vasina,” nia dehan
Nia konsidera, kestaun ne’e depende ba entidade hotu nia hamutuk atu kontribui iha kombate COVID-19 inklui kumpre regra prevensaun no partisipa másimu iha kampaña vasinasaun.
Durante ne’e transporte ne’ebé CIGC Baucau utiliza hosi Diretór institusaun Estadu, enkuantu kona-ba Ambulánsia, daudaun ne’e iha tolu mak disponível ba CIGC no iha tempu hanesan uza atu atende moras ne’ebé tama emerjénsia.
Jornalista : Natalino Belo
Editora : Julia Chatarina
