Ministra Saúde, Odete Maria Freitas Belo. Imajen Tatoli/Francisco Sony.

DILI, 12 agostu 2021 (TATOLI)—Ministériu Saúde (MS), hahú prepara planu estratéjiku nasionál nutrisaun iha setór saúde ba perúdu 2021–2025.

Planu estratéjiku nasionál nutrisaun setór saúde ba periúdu 2021-2025 sei oferese oportunidade ida hodi guia esforsu programátiku sira, hosi setór saúde nian hodi kontribui ba meta ka objetivu nasionál hosi nutrisaun iha setór saúde nian iha tinan lima oin mai.

Notísia relevante:Prémiu nasionál nutrisaun hodi rekoñese inovasaun timor-oan hadi’a má nutrisaun

Melloramentu iha nutrisaun sai nu’udár determinante krítiku ida hodi estabelese iha área dezenvolvimentu kapitál humanu nasaun ne’e nian.

“Tan ne’e, dala ida tan ha’u hakarak enkoraja ita hotu atu bele kontinua partisipa ho másimu no ativu hodi fahe hanoin ba intervensaun-sira ne’ebé mensiona iha esbosu ne’e nia laran. Ita presiza asegura katak intervensaun sira ne’ebé mak alista iha ebosu ne’e alina ho estratéjia no dokumentu politiku seluk ne’ebé eziste ona hanesan planu estratéjiku dezenvolvimentu nasionál 2011-2030,” Ministra Saúde, Odete Maria Freitas Belo, hateten iha ámbitu konsultasaun nasionál ba planu estratéjiku ne’e, iha salaun Katedrál Vila-verde, kinta ne’e.

Planu estraéjiku ne’e ninia referénsia mai hosi planu estratéjiku nasionál ba nutrisaun primeiru, ne’ebé  dezenvolve iha tinan 2004, no mós iha periúdu 2014-2019, ne’ebé kobre asuntu hotu-hotu liga ba nutrisaun hosi setór hotu-hotu.

Setór hirak ne’e mak hanesan saúde, agrikultura, obra públika, edukasaun, no seluk seluk tan, ne’ebé presija tebes esforsu makás atu bele bele hadi’a liu tán.

Reprezentante Uniaun Europeia (UE) iha Timor-Leste (TL), João Bosco Laco-Mau, orgullu tebes ho konsultasaun  nasionál, ba estratejia seitór saúde primária no nutrisaun iha Timor-Leste, tanba bele fó apoiu finanseiru no mós apoiu tékniku ba Governu Timor-Leste, liu-liu ba Departementu Nutrisaun, Ministériu  Saúde, hodi define planu estratéjiku nasionál setór nutrisaun, tinan 2021-2025.

Hahu kedas iha tinan 2014, UE apoia hodi hadi’a nutirsaun iha Timor-Leste ho totál millaun $16-resin ne’ebé kanaliza liuhosi Orsamentu Jerál Estadu (OJE) TL.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here