Ministru Obra Públika, Salvador Eugênio Soares dos Reis Pires. Imajen TATOLI/Egas Cristóvão

AILEU, 12 agostu 2021 (TATOLI)-Ministru  Obra Públika, Salvador Eugênio Soares dos Reis Pires, hateten, Governu liuhosi Ministériu Obra Públika (MOP) planeia atu halo manutesaun estrada iha Aileu ho naruk kilómetru 76.

“Fahe ba reabilitasaun kilómetru 17,7, manutesaun periódika kilómetru 49 no manutesaun rutina kilómetru 10,” Ministru Salvador informa hafoin halo diálogu ho komunidade sira iha suku Fatisi, postu Laulara, munisípiu Aileu, kinta ne’e.

Iha tinan 2019, Governu lansa ona estrada iha postu Laulara bá Solerema ho progresu atinje ona 35%, ne’ebé bainhira finaliza bele fasilita komunidade sira halo movimentasaun.

Aleinde ne’e, Ministru Salvador dehan, trosu Beduku bá Sarlala tama ona ba Fundu Infraestrutura atu halo konstrusaun iha tinan ida-ne’e, maibé dezastre naturál iha fulan-abríl halo estragu barak, tanba ne’e hahú halo retifikasaun ba dezeñu no Bill of Quantity (BOQ).

“Ita tenke retifika fali dezeñu tuir kondisaun ne’ebé la’o hela, ne’ebé sei lori ba Ajénsia Dezenvolvimentu Nasionál (ADN) hodi halo verfikasaun no lori ba Komisaun Administrasaun Fundu Infraestrutura (KAFI) hodi aprova no ikus mai halo konkursu públiku hodi hetan manán-na’in hodi bele halo mobilizasaun,” nia akresenta.

Daudaun ne’e, Governu halo estudu viabilidade ba dezeñu detalladu estrada munisipál Aileu ne’ebé hahú iha tinan 2019 no kuaze atu tama finál.

Estudu viabilidade sira hanesan trosu Aileu bá Gleno ho naruk kilómetru 17,5, Aileu bá Lekidoe ho kilómetru 27, ponte  Mota Ulun, Comoro ho  naruk metru 120, ponte Liurai ho metru 60 inklui manutesaun ba estrada urbana Aileu.

“Ita-nia estudu sira kuaze tama faze finál, kuadu hotu ita lori ba ADN hodi verifika, hafoin lori ba KAFI halo aprovasaun no ba Komisaun Nasionál Aprovizionamentu (CNA, sigla portugés) atu loke konkursu públiku hodi hetan manan-na’in hodi bele ezekuta obra,” nia hatutan.

Kona-ba orsamentu ba konstrusaun estrada rurál mai hosi Governu Timor-Leste.

“Ha’u akompaña dala barak komunidade sira hanoin International Labour Organization (ILO) mak halo estrada rurál, maibé la’ós, Governu Austrália fó apoia finaseiru ba ILO atu fó asisténsia téknika, liuliu fó formasaun ba tékniku sira, maibé orsamentu konstrusaun ne’e ita-nia,” nia afirma.

Nune’e,  Governante ne’e husu ba Autoridade munisipál no komunidade atu kolabora ho empreza ne’ebé kaer projetu.

“Imi kuandu impata, ita labele lakon tempu, ha’u haruka sira ba fatin seluk. Nune’e, imi tenke koopera atu mehi asesu infraestutura bázika sai realidade, tanba ne’e tenke asegura projetu bele la’o ba oin hodi fó benefísiu ba populasaun sira,” Ministru fó hanoin.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here