Ministru Obra Públika, Salvador Eugênio Soares dos Reis Pires, halo diálogu komunitáriu iha postu Laulara, kinta (12/08). Imajen TATOLI/Florêncio Miranda Ximenes

AILEU, 12 agostu 2021 (TATOLI)-Ministériu Obra Públika (MOP) liuhosi Instituisaun Jestaun Ekipamentu, Institutu Públiku (IGE, I.P, sigla portugés) finaliza ona normalizasaun estrada iha munisípiu Aileu, ne’ebé hetan estragu kauza inundasaun iha loron 04 abríl.

“Ami mai halo vizita ba obra estrada ne’ebé hetan estragu tanba inundasaun no IGE halo ona normalizasaun, nune’e atu fasilita komunidade sira-nia movimentasaun ba merkadoria,” Ministru Obra Públika, Salvador Eugênio Soares dos Reis Pires, hateten, bainhira halo diálogu ho komunidade iha postu Laulara, kinta ne’e.

Hafoin simu pedidu hosi Administradór munisipál, MOP orienta kedan IGE fó atendimentu urjente hodi normaliza estrada iha territóriu tomak ne’ebé ho distánsia kilómetru 6.500 tanba antes ne’e hosi Governu dahuluk to’o agora foin halo kilómetru 2.000 resin ho orsamentu millaun $3 resin, ne’ebé fahe ba tipu estrada nasionál, munisipál no rurál.

“Ita-nia osan natoon, ne’ebé kada tinan ita tau oituan ba suku barak, maibé kada tinan ita tau osan hodi halo oituan ho neneik, maibé to’o loron ida ita bele halo hotu,” nia akresenta.

IGE nia papél atu halo normaliziasaun no melloramentu ba estrada, ne’ebé halo normalizasaun ho emérjensia hodi hasai sedimentasaun sira atu  garante movimentasaun populasaun nia.

Iha biban hanesan, Prezidente IGE, Ermenegilda da Costa Laurentin, hateten, institutu responde duni halerik komunidade sira iha munisípiu Aileu hodi halo normalizasaun ba estrada sira kauza kamalimidade  loron 04 abríl.

Iha munisípiu Aileu, postu administrativu tolu hanesan Laulara normaliza kilómetru 14 resin, Lequidoe kilómetru 3,7 no remexio kilómetru 3,8 mak konsege normaliza ona.

“IGE nia papél atu apoia ita-nia komunidade sira ne’ebé mak iha área remota, liuliu atu haree ba normalizaaun mota, melloramentu estrada no halo abertura ba estrada inklui halo atendimentu urjénsia,” nia tenik.

Nune’e mós, Administradór munisípiu Aileu, Abel da Conceição, lori komunidade Aileu nia naran agradese ba MOP no IGE ne’ebé konsege responde pedidu sira hodi normaliza estrada sira ne’ebé hetan estragu.

“Ami agradese ba apoiu ami-nia komunidade hodi normaliza estrada atu fasilita movimentasaun transporte públiku,” nia hatutan.

Administradór postu Administrativu Laulara,  Jacinto Borges, agradese ba Governu tanba fasilita komunidade nia movimentu ho transporte

“Ami laran haksolok tebes tanba iha dezastre naturál ne’ebé akontese foin lalais, halo estrada a’at hosi suku Fatisi ba Dili, maibé ami presiza husu atu halo bee dalan atu udan mai labele estraga estrada,” nia hameno.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here