Semináriu lisiensiamentu frekuénsia, iha salaun Otél Timor, kinta (12/08). Imajen TATOLI/Francisco Sony

DILI, 12 agostu 2021 (TATOLI)—Ministériu Asuntu Parlamentár no Komunikasaun Sosiál (MAPKOMS) hamutuk ho Autoridade Nasionál Komunikasaun (ANC, sigla portugés) introdús lisensa frekuénsia ba entidade rádiu sira liuhosi semináriu.

Ministru Asuntu Parlamentár no Komunikasaun Sosiál, Francisco Martins da Costa Pereira Jerónimo, hateten, atividade ne’e atu informa ba jerente rádiu sira kona-ba prosesu atribuisaun lisensa espetru frekuénsia, nune’e bele fornese informasaun loloos no responsabilidade.

Ministru Asuntu Parlamentár no Komunikasaun Sosiál, Francisco Martins da Costa Pereira Jerónimo. Imajen TATOLI/Francisco Sony

“Rádiu Komunidade sira lakleur tan ita-bo’ot sira sei hetan lisensa espetru frekuénsia, tanba ne’e sosializaun ne’e importante atu hatene tanba atribuisaun frekuénsia hosi ANC, sira mak determina,” Ministru Francisco dehan durante semináriu, iha Otél Timor, kinta ne’e.

Tuir Ministru, Rádiu Televizaun Timor-Leste, Empreza Públika (RTTL, E.P) mak sei hetan frekuénsia a’as liu no tuir mai maka Rádiu Komunidade.

Tanba ne’e, governante ne’e husu ba jerente Rádiu Komunidade 16 atu hatudu vontade di’ak no rona aprezentasaun téknika hosi ANC kona-ba atribuisaun frekuénsia.

Iha biban hanesan, Prezidente ANC, João Olívio Freitas, hateten, introdusaun ne’e importante ba jerente rádiu sira, nune’e bele kumpre Dekretu-Lei númeru 15/2012 kona-ba Regulamentu Setór Telekomunikasaun, iha artigu 61 kona-ba espetru rádiofrekuénsia.

Prezidente ANC, João Olívio Freitas. Imajen TATOLI/Francisco Sony

“Ita bele esplika ba Rádiu Komunidade sira kona-ba prosesu hetan lisensa espetru frekuénsia, lejizlasaun no sansaun ba hirak ne’ebé la rejista frekuénsia rádiu iha ANC,” nia tenik.

Tuir Prezidente ANC, autoridade halo rejistrasaun frekuénsia, maibé tuir Lei Komunikasaun Sosiál númeru 5/2014 19 novembru, iha artigu 28, kona-ba rejistrasaun, hatuur katak rejistrasaun ba meiu komunikasaun sosiál sira iha Konsellu Imprensa, ne’ebé nu’udár medida administrativa la hamosu aktu hodi fó autorizasaun.

“ANC atribui frekuénsia atubele regula téknikamente, bainhira Rádiu Komunidade Ataúro kobre de’it iha Ataúro, téknikamente atu regula ne’e oinsá, ita-bo’ot nia kobertura labele tama iha Dili no autoridade laiha poder atu haree kontiúdu publikasaun, tanba kona-ba kontiúdu MAPKOMS maka responsabiliza,” Prezidente ANC subliña.

Nune’e mós, Jerente Rádiu Komunidade Maubisse, Joaquim Cotinho, husu ba entidade MAPKOMS no ANC ne’e atu fó hanoin ba entidade telekomunikasan hotu.

“Regra labele aplika de’it ba Rádiu Komunidade, maibé mós tenke haree ba rádiu seluk tanba sira mós uza frekuénsia.

Daudaun ne’e eziste ona Rádiu komunidade hamutuk 16 hanesan Rádiu Komunidade Tokodede Liquiça, Rádiu Komunidade Comoro, Rádiu Komunidade Cova Taroman Suai, Rádiu Komunidade Atoni Lifau Oé-Cusse, Rádiu Komunidade Vox Populi Lospalos, Rádiu Komunidade Mauloko Maubisse, Rádiu Komunidade Manukoko Atauro, Rádiu Komunidade Ili-Wai Manatuto, Rádiu Komunidade 1912 Same, Rádiu Komunidade Lian Matebian Baucau, Rádiu Komunidade Kolelemai Sahe Bucoli, Rádiu Komunidade Rai-Husar Aileu, Rádiu Komunidade Povu Viqueque, Rádiu Komunidade Kafe Ermera, Rádiu Komunidade Lian Tatamailau Ainaro, no Rádiu Komunidade Maliana.

Rádiu Komunidade nu’udar meiu ida hosi Governu atu fasilita hasa’e kualidade informasaun hodi fasilita komunikasaun entre povu kada munisípiu ho Governu sentrál hodi hato’o preokupasaun, halo promosaun no hato’o kondisaun suku.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here