Lansamentu kampaña vasinasaun iha salaun apuramentu Admistrasaun Munisípiu Baucau, kinta (12/08). Imajen : TATOLI/Natalino Belo

BAUCAU, 12 agostu 2021 (TATOLI)—Ministériu Administrasaun Estatál (MAE) hahú mobiliza autoridade lokál Baucau hodi sensibiliza komunidade partisipa másimu iha kampaña vasina, nune’e bele hamenus risku propagasaun COVID-19.

“Hahu hosi Prezidente Autoridade Munisípiu (PAM), Administradór postu, Xefe suku no aldeia, husu atu mobiliza komunidade sira atu simu vasina iha postu ne’ebé estabelese ona, tanba ne’e tenke halo serbisu hotu,” Vise-Ministru Administrasaun Estatál, Lino de Jesus Torrezão, hateten iha ámbitu vasina iha salaun apuramentu administrasaun Baucau, kinta ne’e.

Ekipa hosi MAE ne’ebé lidera hosi Vise-Ministru Administrasaun Estatál vizita Baucau durante semana rua hodi hala’o atividade ne’e.

Inisiativa ne’e bazeia ba despaixu Primeiru-Ministru, Taur Matan Ruak, atu forma ekipa interministeriál ne’ebé lideradu hosi Vise Primeiru-Ministru no Ministra Solidariedade Sosiál no Inkluzaun (MSSI), Armanda Berta, ne’ebé ekipa Vise-Ministru Administrasaun Estatál hanesan membru ekipa ne’ebé destaka iha Baucau.

“Hau-nia destakamentu mai iha Baucau atu akompanã servisu ne’ebé entidade relevante sira hala’o hela atu organiza, mobiliza no sensibiliza. Hanesan líder komunitáriu buka atu mobiliza komunidade sira hakbesik iha postu ne’ebé mak pesóal saúde sira halo servisu hodi simu vasina, enkuantu Administradór postu buka halibur Xefe suku no halibur membru Konsellu suku hodi sensibiliza COVID-19 ne’ebé daudaun hadaet to’o ona iha suku no aldeia laran,” nia akresenta.

Tuir despaixu númeru 20/M-MAE/III/2021, hahú hosi Xefe suku to’o membru konsellu suku, delegadu no pesoál apoia servisu admistrasaun suku, iha subsídiu hahú fulan-jullu fahe ba xefe suku $100, xefi aldeia $80, delegadu inklui membru konsellu suku $40 no pesóal apoia administrasaun $20.

Objetivu hosi subsídiu ne’e atu halo serbisu hanesan mobiliza no sensibiliza informasaun kona-ba COVID-19 inklui relata atividade vasina ba postu, munisípiu no sei hato’o ba nasionál.

Tuir alvu kampaña vasinasaun masál iha Munisípiu Baucau hamutuk ba ema 49.972, ne’ebé ohin hahú lansa no sei termina iha loron 24 agostu.

Seremónia ne’e partisipa hosi Diretora Jerál Prestasaun Saude, Odete da Silva Viegas, Diretór Jerál Dezenvolvementu Rúral hosi MAE, Rosito Guterres, PAM, Olívio ‘Bou Lesa’ Freitas inklui Administradór postu, Xefe suku no entidade relevante.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here