Prezidente CNE, Alcino de Araújo Barris. Imajen/TATOLI Egas Cristovao. Imajen TATOLI/Egas Cristovão

DILI, 12 agostu 2021 (TATOLI)—Eleisaun iha Timor-Leste sai sasukat ba Estadu Direitu Demokrátiku tanba liuhosi eleisaun ne’e maka ajuda reforsa konsolidasaun kultura demokrátiku nian.

Notísia Relevante : Eleisaun, tenke konsidera direitu votu ema ho defisiénsia

“Ha’u bele sita mós iha-ne’e katak Komisaun Nasionál ba Eleisaun (CNE, sigla portugés) hetan fali kompeténsia halo apuramentu nasionál ba votu nulu ne’ebé sempre iha númeru ke aas tebes iha eleisaun sira. Peskiza ida-ne’e realiza iha tinan 2019 ho durasaun fulan hitu (7), hahú hosi abríl to’o novembru, kobre territóriu nasionál ho totál respondente 9.487 ne’ebé hili. Alvu 778.041 eleitór kualifikadu tinan 2019 nian iha rai-laran de’it, hanesan munisípiu 12 inklui RAEOA, iha postu administrativu 65, suku 252 no aldeia 2.235,” Prezidente CNE, Alcino de Araújo Barris, hateten ba jornalista sira iha salaun Laline Larigutu, kinta ne’e.

Alcino de Araújo Barris hateten peskiza eleitorál ho tema “Eleisaun iha Timor Leste, sai Sasukat ba Estadu Direitu Demokrátiku” tanba liuhosi ida-ne’e mak ajuda hodi reforsa konsolidasaun kultura demokrátiku nian.

Realizasaun peskiza eleitorál iha tinan 2019 ne’e akontese iha tempu oportunu ida, atu avalia servisu hosi órgaun administrasaun eleitorál no melloramentu ba sistema eleitorál, no mós potensiál peskiza nian hodi ajuda reforsa konsolidasaun kultura demokrátiku ne’ebé partisipativu sidadaun nian alende reflete mós nesesidade emerjente atu hala’o reforma ba lejizlasaun no oinsá bele halo regulamentu eleitorál ne’ebé utiliza durante eleisaun 2017 no 2018 no ikus rekomendasaun balu ne’ebé CNE hato’o konsege hetan konsiderasaun hosi lejizladór sira hanesan Lei 16/2021 de 28 Jullu, alterasaun ba datoluk hosi Lei 5/2006 Órgaun Administrasaun Eleitorál nian no Lei 15/2021, alterasaun ba daneen hosi Lei 7/2006 Lei eleisaun Prezidente Repúblika ne’ebé foin aprova.

Alcino Barris konsidera partisipasaun sívika no polítiku sidadaun sira-nian, inklui mós ema ho defisiénsia no feto sira fó mós prespetiva sira ligadu ba “kontratu sosiál ne’ebé selebra entre eleitór sira ho partidu polítiku iha loron eleisaun”, nune’e bele sai mós referénsia ba parte interesada sira hodi halo formulasaun polítika sustentável importante tebes hodi kontribui ba prosesu evolusaun konsolidasaun demokrasia iha rai-laran iha ámbitu boa-governasaun nian.

Tuir CNE nia haree, limitasaun sira kona-ba falta informasaun ligadu ho resenseamentu no falta kondisaun asesu hanesan estrada, eletrisidade, internet sai hanesan fatór ne’ebé dezmotiva no hamosu tendénsia akontese tratamentu dezigualdade no mós diminuisaun taxa partisipasaun.

Iha futuru CNE sei nafatin buka solusaun oinsá atu bele kontrola obstákulu hanesan temi daudaun, tanba esensiál maka konsidera nafatin ema nu’udar sentru ba dezenvolvimentu kulturál, polítiku, ekonómiku sosiál nasaun ne’e nian.

Ho rezultadu peskiza ne’e, Prezidente CNE Alcino de Araújo Barris, agradese ba entidade hotu-hotu no pesoál tékniku inklui komisáriu sira no espesiál ba Diretór Nasionál sira, Diretór CNE, Munisipál, Delegadu sira, membru ekipa peskizadór sira, autoridade lokál, administradór postu sira, parte seguransa no korrespondente sira tomak ne’ebé kontribui ho sira-nia empeñu tomak nune’e bele konkretiza ho susesu boot peskiza ida-ne’e.

Jornalista   : Osória Marques  

Editór        : Francisco Simões

HAKEREK NO HATÁN

Please enter your comment!
Please enter your name here