Xefe Estadu Maiór Jenerál F-FDTL, Tanente Jenerál Lere Anan Timur. Imajen TATOLI/Egas Cristovão.

DILI, 11 agostu 2021 (TATOLI)– Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Lere Anan Timur, kestiona no husu tanbasá autoridade Timor-Leste la kaer juventude na’in-113 ne’ebé hakuur ilegal ba Indonézia, maibé ema Indonézia kaptura fali joven sira-ne’e iha área jurisdisaun Indonézia nian.

Notísia Relevante : FONGTIL rekomenda ba Governu kriminaliza ema halo viajen ilegál

Ho duvida ne’e, Tenente Jenerál Lere Anan Timur husu ba F-FDTL ho Polísia Nasionál Timor-Leste (PNTL) atu  investiga didi’ak joven na’in-113 ne’ebé viajen ilegál ba Atambua, Indonézia ba interese organizasaun arte marsiál nian.

Lere hateten, tanbasá mak joven sira-ne’e haku’ur fronteira Timor-Leste nian la kaer kedas no tama to’o tiha ona ema nia rain maka foin ema nia autoridade kaer fali. Signifika PNTL-FFDTL tenke toma responsabilidade ba asuntu sira ne’e.

“Ha’u ho Komandante Jerál PNTL, Komisáriu Faustino da Costa tenke toma responsabilidade tanbasá mak joven ba ne’e la kaer, maibé fila mak kaer. Ida-ne’e problema nune’e tenke investiga,” Tenente Jenerál Lere Anan Timur hatete ba jornalista sira, hafoin enkontru ho Xefe Estadu Francisco Guterres “Lú Olo” iha Palásiu Prezidensiál, Dili, kuarta ne’e.

Tenente Jenerál Lere Anan Timur promote sei duni sai membru Polísia Nasionál Timor-Leste (PNTL) ho membru FALINTIL-FDTL ne’ebé fasilita sidadaun sira tama-sai ilegál iha fronteira terrestre.

“Sira ne’ebé fasilita, ha’u hetan, ha’u duni sai, agora ha’u duni sai kedas,  la’ós duni sai de’it maibé dahuluk prosesu tenke sa’e nia, kastigu nia no mak hafoin duni sai tanba ida-ne’e kontra nia juramentu, kontra nia devér no nia misaun,” Lere afirma.

Nia tenik, membru PNTL ho F-FDTL bainhira fasilita krime ruma la serve atu hela iha instituisaun nia-laran hodi kontinua servisu, maibé haruka sai hosi instituisaun. Maibé PNTL ho F-FDTL ne’ebé kaptura sidadaun hakat ilegál iha fronteira tenke halo investigasaun hodi buka hatene tanba saida mak ba la kaer no fila mak foin bele kaer.

Nia hatete seguransa iha fronteira ne’e tenke truka hela de’it, hanesan F-FDTL kada fulan tolu tenke truka no muda fali ba fatin seluk. Maibé PNTL la’e, tinan-tinan nia mak nafatin de’it. Ida-ne’e mak problem.

Ho kestaun hirak-ne’e, Lere hatete joven ne’ebé sa’e sabuk iha rai-li’ur tanke iha konsiénsia katak nia Timoroan. Tanba ne’e, husu ba Governu aban bainrua kria kondisaun atu joven tuir arte marsiál sira tanba arte marsiál ne’e asset Timor nian.

Jornalista   : Osória Marques

Editór        : Francisco Simões

1 KOMENTÁRIU

HAKEREK NO HATÁN

Please enter your comment!
Please enter your name here