Diretór Ezekutivu Telkomcel Timor-Leste, Yogi Rizkian Bahar. Imajen TATOLI/Eugénio Pereira

DILI, 11 agostu 2021 (TATOLI)–Operadór telekomunikasaun internasionál indonéziu, Telkomcel sai vensedór konkursu públiku númeru 001/ANC/VIII/2021 ba lisensa rádiu frekuénsia 2300 MHz ho kapasidade 20 Mbps, ne’ebé implementa ho objetivu reforsa no hasa’e kualidade liña internet ba períodu tempu tinan 15.

Tuir nota ne’ebé Agência TATOLI asesu iha kuarta ne’e, desizaun ne’e bazeia Governu liuhosi Ministériu Transporte no Komunikasaun no Autoridade Nasionál Komunikasaun (ANC, sigla portugés).

Diretór Ezekutivu Telkomcel, Yogi Rizkian Bahar, apresia no agradese ba Governu tanba fó fiar ona ba empreza hodi liu selesaun.

“Investimentu ho períodu tempu naruk sai hanesan evidénsia konkreta no hatudu kompromisu sériu hosi Telkomcel atu serví no oferese servisu rede internet di’ak liután, ne’ebé hetan apoiu másimu hosi Telekomunikasaun Indonézia Internasionál (Telin) Group iha Jakarta, Indonézia, ne’ebé iha asaun maioria iha Telkomcel Timor-Leste,” nia subliña.

Notísia relevante: ANC atribui lisensa espektru frekuénsia adisionál ba operadór telekomunikasaun tolu

Prosesu aumenta kapasidade espetrum atu haforsa kualidade rede internet no hatudu kompromisu empreza atu hasa’e kapasidade liña internet hodi aselera prosesu infraestrutura no prosesu dijitalizasaun teknolojia.

“Espera ho prosesu upgrade bandwidth no espetrum frekuénsia 2300 Mhz ho kapasidade  fita 20 Mbps, bele ajuda no haforsa dezenvolvimentu servisu broadband internet no supporta prosesu aselerasaun ekosistema dijitalizasaun iha teritóriu Timor-Leste tomak no utiliza kapasidade ho másimu hodi bele garante kualidade liña internet,” nia akresenta.

Nune’e mós, inisiativa ne’e bele apoiu ekosistema no komunidade kreatividade dijitál, komérsiu, ne’ebé bele motiva prosesu transformasaun dijitál iha Timor-Leste, liu-liu ba dezenvolvimentu iha segmentu edukasaun, bankária, no negosiante  mikro, kiik no médiu.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here