Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (11/08). Imajen TATOLI/Egas Cristóvão

DILI, 11 agostu 2021 (TATOLI)–Governu liuhosi reuniaun Konsellu Ministru (KM) deside hodi estende serka sanitária iha munisípiu Dili no Ermera to’o loron 26 agostu 2021.

Desizaun ne’e ezekutivu sira foti, hafoin analiza aprezentasaun kona-ba pontu situasaun epidemiolójika país hosi Sala Situasaun, Sentru Integradu Jestaun Krize (CIGC, sigla portugés).

“Governu aprova projetu Rezolusaun Governu nian ne’ebé mantein impozisaun serka sanitária iha munisípiu sira Dili  no Ermera  to’o tuku 23:59 husi loron 26 fulan-agostu”, Ministru Prezidénsia KM, Fidelis Manuel Leite Magalhães relata, hafoin ramata reuniaun ezekutivu iha Palásiu Governu, kuarta ne’e.

Notísia relevante: Governu impoin hikas serka sanitária iha Ermera, renova iha Dili

Ho nune’e, bandu sirkulasaun ema entre munisípiu Dili no Ermera, inklui sirkunskrisaun administrativa sira-seluk, exetu iha kazu hirak ne’ebé ninia fundamentu forte tanba razaun seguransa públika, saúde públika, asisténsia umanitária, manutensaun sistema abastesimentu públiku, ka razaun seluk ne’ebé presiza atu hala’o ba interese públiku.

“La inklui iha proibisaun sirkulasaun ida-ne’e individuu sira ne’ebé komprova vasinasaun kompleta ka doze rua kontra COVID-19, no mós labarik sira ho idade tinan 6 mai kraik, ne’ebé akompaña indivíduu sira ne’e,” Portavoz Governu reforsa.

Antes ne’e, Governu deside hodi impoin hikas serka sanitária iha Ermera, hahú tuku 00:00 loron 29 jullu 2021 to’o tuku 23:59 loron 12 agostu 2021, ho razaun katak bazeia ba informasaun ne’ebé KM simu katak númeru infesaun COVID-19 derrepente de’it sa’e maka’as.

Tuir dadus ne’ebé fó sai hosi CIGC, to’o tersa (10/08) rejista kazu pozitivu ativu iha Ermera hamutuk 722, rekuperadu laiha no kazu pozitivu foun na’in-haat.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here