Mediadór SEFOPE munisípiu Baucau, Basílio Ramos das Neves. Imajen TATOLI/Natalino Belo

BAUCAU, 11 agostu 2021 (TATOLI)–Mediadór Sekretaria Estadu Formasaun Profisionál no Empregu (SEFOPE) munisípiu Baucau, Basílio Ramos das Neves, hateten, durante tempu serka sanitária sempre halo atividade prevensaun hodi minimiza kazu entre traballadór no kompañia.

“Antes ne’e, ami halo sosializasaun kona-ba Lei Traballadór númeru 4/2012 ba kompañia sira, maibé hahú tinan 2012 mai leten ita halo de’it prevensaun no bainhira empregadór balun la komprende bele haruka karta ba ami hodi halo esplikasaun ba traballadór sira,” Mediadór SEFOPE Baucau informa ba Agência TATOLI, iha ninia knaar fatin, Villa nova, kuarta ne’e.

Basílio esplika, traballadór sira tenki iha karta kontratu molok atu serbisu iha kompañia ka loja ruma, nune’e bele minimiza problema no kuandu mosu kazu labele difikulta durante mediasaun.

“Realidade barak akontese, serbisu hela maibé kontratu laiha, nune’e bainhira mosu problema difikulta prosesu mediasaun,” nia akresenta.

Tuir Mediadór ne’e, durante sekra sanitária seidauk iha kompañia ruma iha mak hapara traballadór, nune’e SEFOPE Baucau kontinua halo prevensaun hodi ko’alia direta ho loja no kompañia sira atu selu direitu traballadór nian, ne’ebé pelumenus metade hodi minimiza hamosu problema.

“Ami halo esplikasaun hanesan parte ida hosi prevensaun, liuhosi loja no kompañia sira atu akomoda direitu traballadór sira, pelumenus metade atu aguenta moris,” nia hatutan.

Iha fatin hanesan, Diretór SEFOPE Baucau, Romualdo António de Sousa, hateten, tuir lei bainhira iha kazu ruma, faze dahuluk sei iha notifikasaun ba parte rua, bainhira laiha solusaun nafatin bele to’o faze daruak no datoluk, maibé bainhira nafatin laiha solusaun, bele hasa’e ba arbitrajen no sei notifika to’o datoluk mak nafatin laiha solusaun sei ramata iha Tribunál.

“Kazu iha maibé ita buka dalan no maioria ita rezolve iha ne’e,” nia tenik.

Durante serka sanitária, SEFOPE Baucau rejista totál keixa tolu, kompostu hosi kompañia konstrusaun ida ligadu ho direitu traballadór, traballadór seguransa torre kompañia telekomunikasaun ida iha Triloka no kazu entre traballadór cleaner ho fundasaun edukasaun ida ligadu ho oras serbisu.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here