Diretór SEFOPE Baucau, Romualdo António de Sousa. Imajen TATOLI/Natalino Belo

BAUCAU, 11 agostu 2021 (TATOLI)–Diretór Serkretaria Estadu Formasaun Profisionál no Empregu (SEFOPE) munisípiu Baucau, Romualdo António de Sousa, enkoraja estudante finalista hosi ensinu sekundáriu ne’ebé laiha kbiit ekonomia hodi bele kontinua tuir formasaun profisionál iha sentru formasaun profisionál, nune’e bele hasa’e kapasidade asesu kampu traballu.

“Ami tama sai eskola fó akonsolamentu ba joven sira hodi enkoraja no fó hanoin atu la’o tuir buka sentru formasaun hodi prepara-an hasoru serbisu tantu rai-laran no li’ur,” Diretór SEFOPE informa ba Agência TATOLI, iha ninia knaar fatin, kuarta ne’e.

Sentru Dezenvolvementu Komunitária (CDC, sigla portugés) iha Triloka iha área agrikultura, Sentru formasaun Vizaun foin sa’e iha área Admistrasaun jerál no Irmão Carlos Gamba Don Bosco Fatumaka área konstrusaun, karpintaria, kanalizasaun, soldadura.

Hosi sentru formasaun hirak ne’e, úniku Canosiana mak durante serka sanitária kontinua halao atividade tanba formandu sira hela iha koléjiu, enkuantu tolu seluk foin mak hahú atividade hafoin Governu hakotu serka sanitária iha Baucau.

“Barak liu mak hosi munisípiu seluk, entaun formandu sira hela koléjiu, entaun madre sira kontrola, restu paradu no foin daudaun mak foin la’o fali,” nia hateten.

Daudaun ne’e, atividade formasaun hahú hikas fali, maibé tenke kumpre regrae prevensaun COVID-19 hanesan fase liman, uza máskara no distansiamentu fíziku.

Bainhira ramata tuir formasaun, sira aprezenta-an iha SEFOPE Baucau atu rejistu hodi atribui kartaun evidénsia.

SEFOPE Baucau rasik iha tinan 2018 to’o 2019 halo selesaun ba kandidatu traballador Austrália hosi Baucau hamutuk 1.754 no hosi númeru ne’e, ema 673 mak pasa ona no hein atu aranka ba Austrália.

“Munisípiu Baucau hosi ema 673, ema 200 resin mak aranka, nune’e pelumenus hamenus ona desempregu iha Baucau,” Romualdo hatutan.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here