Komunidade kontinua simu vasina AstraZeneca iha Sentru Saúde Comoro, Dili, segunda (09/08/21). Imajen Tatoli/António Gonçalves.

DILI, 11 agostu 2021 (TATOLI) – Xefe Suku Fatumesi, Postu Administrativu Bazartete, Munisipiu Liquiça, Eduardo Alves da Cruz, hateten maioria populasaun iha nia suku simu ona vasina AstraZeneca.

Notísia Relevante : Vasina atinje 70%, estadu emerjénsia sei fila ba normalidade

“Komunidade iha ne’e mai simu vasina ne’e grupu kada  loro-loron la para, ne’ebé sira maioria simu ona vasina, balu kompleta ona doze segundu no balun sei hein rezultadu,” dehan Eduardo Alves da Cruz, informa ba Agéncia Tatoli via telefone hosi Dili, kuarta ne’e.

Hanesan, autoridade lokál nafatin husu ba komunidade sira hotu atu hakbesik an ba vasina hodi aumenta imunidade kontra Covid-19.

“Hanesan Xefe Suku ha’u sempre ko’alia ba komunidade sira atu mai vasina. Komunidade iha ne’e barak liu mak hakarak tebes mai sona tanba sira hatene sona ne’e di’ak duni atu aumenta sira nia imunidade hasoru Covid-19,” nia dehan.

Nia mós husu ba komunidade  atu labele fiar informasaun falsu hodi lakohi tuir vasina, tanba Governu laiha intensaun at hodi oho nia povu.

Populasaun iha Fatumesi hamutuk 2.000-resin kompostu hosi aldeia haat (4 ) mak hanesan Bazartete, Etir, Durbasa no Leguimea.

Jornalista   : Hortencio Sanchez

Editór        : Francisco Simões

 

HAKEREK NO HATÁN

Please enter your comment!
Please enter your name here