Ministru Transporte no Komunikasaun (MTK), José Agostino, entrega vial AstraZenrca ba pesoál saúde iha sentru saúde Viquque-Vila, iha ámbitu lansamentu doze daruak, iha munisípiu Viqueque, kuarta (11/08/21). Imajen Tatoli/Vitorino Lopes da Costa.

VIQUEQUE, 11 agostu 2021 (TATOLI)—Ministru Transporte no Komunikasaun (MTK), José Agostinho, halo lansamentu ba vasina AstraZeneca doze daruak iha postu saúde Viqueque Villa, munisípiu Viqueque, kuarta ne’e.

“Objetivu hosi lansamentu programa nasionál vasinasaun doze daruak importante tebes tanba agora COVID-19 perigu liuliu atu antesipa variante delta,” José Agostinho hateten iha serimónia lansamentu.

Notísia relevante:Vasina doze dahuluk iha Viqueque hamutuk 1.093

Nia husu ba populasaun atu kolabora ho parte saúde liuliu ba asaun prevensaun nian importante tebes, hodi kontra moras ne’e.

Ministru ne’e mós klarifika ba populasaun Viqueque katak, desizaun Estadu Timor-Leste hodi implementa Estadu emerjénsia atu ajuda salva povu, maski iha ema balun interpreta negativu, dehan ne’e limita direitu ema-nian.

Iha fatin hanesan, vise-koodernadór kampaña vasinasaun iha munisípiu Viqueque, atuál Komandante Polísia Nasionál Timor-Leste (PNTL) Viqueque, Superintendente, Sebastião Alves Quintão, observa katak, populasaun iha suku to’o aldeia hotu-hotu entusiazmu tebes hodi hakat ba sentru vasinasaun atu simu vasina, ne’e hatudu rezultadu ne’ebé pozitivu.

“Durante ne’e, ami ba suku no aldeia komunidade entusiazmu tebes hodi simu vasina doze dahuluk no daruak ho totál ema na’in 23.945,” Superintendente, Sebastião Alves Quintão, subliña.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here