Edifísiu eskola filiál Oplegul, besik monu ona. Imajen Tatoli/ Sérgio da Cruz

DILI, 11 agostu 2021 (TATOLI)-Ministériu Edukasaun, Juventude no Desportu (MEJD) liuhosi Diresaun Nasionál Infraestrutura Edukativa (DNIE), kuarta ne’e, realiza  Programa Konstrusaun no Reabilitasaun Infraestrutura Edukativa (PKRIE) ne’ebé hahú uluk iha Munisípiu Dili.

Vise-Ministru MEJD, António Guterres, hateten Programa Konstrusaun no Reabilitasaun Infraestrutura Edukativa ne’e konsebidu iha Governu Konstitusionál daualuk hodi hatán ba Timor-oan sira-nia ezijénsia no halerik iha setór edukasaun liuhosi Orsamentu Jerál Estadu (OJE) 2021.

“Atividade prinsipál hosi programa ida-ne’e atu konstrui no reabilita instalasaun infraestrutura edukativa iha territóriu Timor-Leste, tanba PKRIE ne’e planu anuál MEJD nian ba 2021 iha obrigasaun implementa konstrusaun infraestrutura ba  eskola hamutuk 221 ne’ebé hetan ona aprovasaun hosi Parlamentu Nasionál, nune’e tinan ida ne’e sei implementa ba eskola 169, maibé sei implementa uluk iha Dili ba eskola hamutuk 16,” António Guterres, hateten liuhosi nia diskursu bainhira halo abertura atividade diseminasaun mata dalan implementasaun projetu komunitáriu, Edukasaun Non Formal, Vila-Verde, Dili.

Orsamentu 2021 MEJD nian ne’ebé tama ba fundu transferénsia públika atu halo reabilitasaun infraestrutura edukativa ne’e hamutuk $20.000.000, no projetu refere ne’e sei implementa iha  setembru 2021.

Diretór Infraestrutura Edukasaun, Helio Lopes afirma, projetu reabilitasaun infraestrutura ba eskola 169 iha nivel nasionál ne’e hahú hosi Pre-eskolár to’o Ensinu Sekundária no Tékniku Vokasionál. Maske nune’e,  hosi númeru eskola sira-ne’e maioria ba ensinu báziku sira tanba ensinu báziku iha territóriu nasionál ne’e númeru boot no kondisaun infraestrutura mós aat mak barak.

Nia esklarese, hosi reabilitasaun eskola iha nivel nasionál ne’e projetu refere hanesan halo reabilitasaun konstrusaun sala aula, aumenta edifísiu eskola nian, moru, biblioteka no sala profesór, tanba tinan ne’e hotu-hotu hatene hosi 221 eskola ne’e MEJD tenke kumpre no kompleta sala aula hamutuk 680, ne’ebé tau ona iha Orsamentu Jerál Estadu.

Jornalista   : Arminda Fonseca

Editór         : Francisco Simões

HAKEREK NO HATÁN

Please enter your comment!
Please enter your name here