Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (11/08). Imajen TATOLI/Egas Cristóvão

DILI, 11 agostu 2021 (TATOLI)—Governu liuhosi reuniaun Konsellu Ministru (KM) aprova Projetu Rezolusaun, ne’ebé mantein konfinamentu domisiliáriu jerál ba populasaun hosi postu administrativu Ermera no Railaco, iha munisípiu  Ermera to’o tuku 23:59 loron 25 agostu 2021.

Ezekutivu sira foti desizaun ne’e hafoin analiza ba aprezentasaun kona-ba pontu situasaun epidemiolójika país hosi Sala Situasaun, Sentru Integradu Jestaun Krize (CIGC, sigla portugés).

“Infelizmente tanba konsidera situasaun vírus ne’ebé maka daet iha postu rua ne’e, Konsellu Ministru tenke foti duni medida difisil ida-ne’e, ne’ebé impoin konfinamentu domisiliáriu jerál ba postu rua iha Ermera,” Ministru Prezidénsia Konsellu Ministru, Fidelis Manuel Leite Magalhães, relata, hafoin ramata reuniaun ezekutivu, iha Palásiu Governu, kuarta ne’e.

Notísia relevante: Governu impoin konfinamentu domisiliáriu jerál iha postu administrativu rua iha Ermera

Impozisaun ne’e ho kondisaun komunidade sira tenke hela iha uma ka iha alojamentu temporáriu, ne’ebé inklui sentru akollimentu, exetu iha situasaun ne’ebé prevee ona iha anteriór, liuliu tanba razaun saúde, serbisu, asesu ba sasán no servisu nesesidade bázika nian.

Maski nune’e, ba ema-sira ne’ebé komprova vasinasaun kompleta ka doze daruak kontra COVID-19, la inklui iha impozisaun konfinamentu domisiliáriu ne’e.

To’o loron 10 agostu 2021, sistema saúde rejista kazu konfirmadu iha Ermera hamutuk 871, ne’ebé kazu ativu 722, kazu rekuperadu 149, ne’ebé ho kategoria transmisaun komunitária.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here