Xefe Estadu Maiór Jenerál F-FDTL, Tanente Jenerál Lere Anan Timur. Imajen TATOLI/Egas Cristovão.

DILI, 11 agostu 2021 (TATOLI)—Iha loron 20 agostu mai ne’e, Estadu no povu Timor-Leste sei selebra loron Forsa Armada Libertasaun Nasional (FALINTIL) ba da-46 (20 agostu 1975-2021). Tuir planu inísiu Estadu nian, katak selebrasaun loron istóriku ne’e atu halo iha Munisípiu Ainaro, maibé tanba kestaun tékniku balun, muda fali fatin selebrasaun nian mai Dili.

Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál, Lere Anan Timur, konfirma katak antes ne’e deside atu halo iha Munisípiu Ainaro, maibé agora selebra fali iha Dili tanba Administradór Munisípiu Ainaro nian ba komemora fali Hatubuilico, nune’e deside no muda fali komemorasaun ne’e iha Dili.

“Antes ne’e ita deside ata halo iha Munisípiu Ainaro, maibé ita-nia Administradór Munisípiu Ainaro ba selebra fali iha Hatobelico,  entaun ita deside fali loron FALINTIL iha de’it Dili,  nune’e ema hotu partisipa,” Lere Anan Timur haktuir ba jornalista sira hafoin hasoru malu Prezidente Repúblika, Francisco Guterres “Lú Olo”, kuarta ne’e, iha Palásiu Prezidensiál, Dili.

Tenente Jenerál Lere Anan Timur, informa iha atividade Tour FALINTIL ‘Dalan ba Dame’ ne’ebé sei hahú iha loron 15 agostu ne’e.

“Ami-nia objetivu atividade ‘Tour FALINTIL Dalan ba Dame’ realiza atu memorize no fó hanoin ba lider sira-ne’ebé tuir mai. Nune’e labele haluha ita-nia istória funu”, Lere tenik.

Tenente Jenerál Lere Anan Timur fó lembra katak istória Timor-Leste hahú funu sivíl, depois memória diferensa interna, nune’e liuhosi atividade ida-ne’e para normaliza tiha tanba to’o agora ema ida seidauk halo ida-ne’e.

“Ho ida-ne’e mak loron 15 agostu, ami sai hosi Dili depois liuhosi Palapaso tanba iha ne’ebá komandante Uniaun Demokrátiku Timorense (UDT) nia uma. Kontinua ba Laclo tanba fatin UDT ho UDT oho malu iha ne’ebá. Depois ami toba iha Baucau no kontinua kedas ba Ilomar tanba fatin ne’ebá ne’e FRETILIN  ho FRETILIN oho malu. Ida-ne’e hotu atividade sei hakat ba iha Uatulari no kontinua ba Munisípiu Same no loron 19 agostu, ami to’o iha Dili no ita sei komemora 20 agostu iha Dili”, Lere hateten.

Komandu F-FDTL mós aproveita serimónia istóriku ne’e sei iha promosaun diviza ba sarjentu no ofisiál sira-ne’ebé konklui ona kursu iha akademia Xina no Japaun, purvolta na’in-20.

Jornalista   : Osória Marques

Editór        : Francisco Simões

HAKEREK NO HATÁN

Please enter your comment!
Please enter your name here