DILI, 11 agostu 2021 (TATOLI)—Hahú hosi juñu to’o jullu, serbisu imigrasaun aplika ona multa ba ema na’in 20-resin ne’ebé hakat ilegál hosi fronteira terrestre ba Atambua, Nusa Tengara Timur (NTT), Indonézia.
Diretór Jerál Serbisu Imigrasaun, Superintendente Asistente, Luis Soares Barreto, hateten sidadaun hirak-ne’e maioria Timoroan no Unidade Patrullamentu Froteira (UPF) kaptura iha fronteira, hafoin kaer toman tanba hala’o atividade komersíu ho dalan ilegál iha Indonézia.
Notísia relevante:Kompleta kuarentena, serbisu imigrasaun sei prosesa Timoroan 113
“Iha prosesu administrativu ita aplika koima ba ema na’in 20-resin ho kada ema $250, tanba viola regra Estadu emerjénsia,” Superintendente Asistente, Luis Soares Barreto, hateten ba jornalista-sira iha kna’ar fatin, Vila-verde, kuarta ne’e.
Tuir dekretu Governu númeru 18/2021, 01 jullu, kona-bá medida ezekusaun deklarasaun Estadu ermerjénsia efetua hosi dekretu Prezidente Repúblika númeru 39/2021 30 juñu, iha artigu 7 obrigatóriu kontrola sanitáriu, iha alinea 4 hateten ba indivídu ne’ebé tama-sai territóriu nasionál ho dalan ilegál, sei hetan koima $30-$250.
Tuir planu, serbisu imigrasaun sei loke prosesu investigasaun ba Timoroan na’in 113 ne’ebé autoridade seguransa Indonézia deporta mai TL iha tersa ne’e, bainhira kumpre ona kuarentena durante loron 14.
Jornalista: Nelson de Sousa
Editór: Cipriano Colo
