Prezidente Komisaun G ne’ebé trata asuntu Edukasaun, Juventude, Kultura no Sidadania, Deputadu António Verdiál de Sousa. Imajen/Tatoli.

DILI, 11 agostu 2021 (TATOLI)-Vise-Xefe Bankada Kmanek Haburas Unidade Nacional Timor Oan (KHUNTO), Deputadu António Verdiál de Sousa husu ba Governu atu kontinua kontrola sidadaun sira hodi kumpre nafatin sistema protokolu saúde ba kombate transmisaun covid-19 iha rai-laran.

Ministériu Saúde hamutuk ho Organizasaun Mundiál Saúde (OMS), antes ne’e estabelese ona padraun ba prevensaun Covid-19 maka uza máskara, uza hand sanitizer, fase liman beibeik ho sabaun, garante distansiamentu fiziku no sosiál no mós meius seluk tan.

Notísia Relevante:Jogu futeból iha Maliana, ema barak la kumpre protokolu saúde

Maibé hosi rezultadu observasaun ne’ebé maka Deputadu ne’e halo daudaun ne’e identifika sidadaun barak maka ikus-ikus ne’e la kumpre ona protokolu saude tanba la uza ona máskara, laiha ona distansiamentu sosiál no fiziku no seluk tan.

“Tanba estabelesimentu barak mak la kumpre regra ne’ebé mak hato’o hosi Ministériu Saúde no Organizasaun Mundiál Saúde, hanesan la mantein distansiamentu sosiál, loja sira la tau bee-moos atu vizitante sira fase-liman, transporte públiku sira la kumpre regra no merkadu sira la mantein ona distansiamentu sosiál tanba laiha seguransa atu kontrola no ema uza maskára menus ona,” nia levanta asuntu ne’e iha PN, kuarta ne’e.

Nia afirma Bankada KHUNTO kontinua apoiu polítika VIII Governu Konstitusionál hodi halo prevensaun no propagasaun hasoru pandemia globál Covid-19 iha rai laran liuhosi aprovasaun no renovasaun Estadu Emerjénsia sira maibé realidade implementasaun EE iha terrenu la másimu.

“Lae ita haree kada fulan renova Estadu emerjénsia ne’e laiha efeitu,” Vise-Xefe Bankada KHUNTO ne’e fó hanoin.

Ho nune’e, Bankada KHUNTO husu ba ministériu kompetente atu tau atensaun ba pontu sira-ne’ebé mensiona liga ho transmisaun variante foun Delta.

Notísia Relevante:PNTL husu komunidade kontinua kumpre protokolu saúde

Jornalista:Evaristo Soares Martins

Editór:Agapito dos Santos

HAKEREK NO HATÁN

Please enter your comment!
Please enter your name here