Primeiru-Ministru, Taur Matan Ruak. Imajen Tatoli/Francisco Sony.

DILI, 11 agostu (TATOLI)—Primeiru Minsitru (PM), Taur Matan Ruak, deklara Governu sei husu funsionáriu públiku, atu obrigatoriamente tenke simu kualkér vasina COVID-19, ne’ebé rekoñesidu hosi Organizasaun Munidál Saúde (OMS), no tenke aprezenta kartaun vasina bainhira hala’o serbisu Estadu.

“Governu sei husu funsionáriu públiku hotu-hotu ne’ebé serbisu iha Estadu, bainhira tama serbisu tenke iha kartaun vasina. Tanba, ida-ne’e nasaun balun komesa halo ona, entaun iha Timor-Leste ita sei ejize mós ida-ne’e. Ezemplu iha Estadu Unidu, empreza-sira atende de’it funsionáriu-sira ne’ebé vasinadu. Ida ne’ebé la vasina, hela iha uma to’o hasai hosi serbisu. Provalvelmente, iha Timor ita sei uza ida-ne’e atu ita-nia sidadun-sira  labele ejize no akuza de’it Governu, maibé sira rasik mós presiza sente,” PM Taur Matan Ruak, hateten lia hirak-ne’e, iha edifísiu SAMES, Kampung Alor, kuarta ne’e.

Notísia relevante:Aban vasina AstraZeneca doze 300.000 hosi Austrália to’o TL

Governu sei husu funsionáriu públiku-sira aprezenta kartaun vasina, tanba ema hotu-hotu tenke kontribui ba prevensaun COVID-19 ho nia variante ne’ebé oras ne’e invade ona mundu.

Xefe Governu ne’e  mós apresia ba serbisu saúde-nian durante tinan rua hodi hamrik iha oin atu kombate moras  ida-ne’e.

“Dala barak ha’u mós sente triste ita boot-sira hetan ofensa iha fatin-fatin,” Taur Matan Ruak hato’o solidariedade ba liña frente-sira.

Iha oportunidade ne’e, Primeiru Ministru entrega vial vasinasaun ba membru Governu-sira atu implementa iha munisípiu 12 inklui Rejiaun Administrativa Espesiál Oé-cusse Amebeno (RAEOA).

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here