DILI, 11 agostu 2021 (TATOLI)—Ministru Prezidénsia Konsellu Ministru no Portavoz Governu, Fidelis Manuel Leite Magalhães, hateten, daudaun ne’e Governu liuhosi Komisaun interministeriál koordenasaun ba implementasaun medida prevensaun no kontrolu surtu COVID-19 halo ona reuniaun hodi diskute hamutuk kona-ba normalidade foun.
Maski nune’e, tuir nia, atu fila ba normalidade depende ba konsiénsia sidadaun sira ne’ebé tenke partisipa másimu iha kampaña vasina.
“Iha tempu oin-mai Governu tenke hahú hanoin ona normalidade foun, entaun diskusaun tékniku detallada ne’e hala’o ona hosi komisaun interministeriál. Entaun iha normalidade foun ne’e tenke soe responsabilidade ba sidadaun idaidak iha konsensializasaun atubele foti medida satu prevene moras ne’e labele da’et,” Ministru hateten iha Palásiu Governu, kuarta ne’e.
Notísia relevante: Vasina efetivu, númeru pozitivu COVID-19 hahú menus
Governante ne’e klarifika, vasina la’ós Governu implementa hodi prejudika fali sidadaun sira-nia moris, maibé atu proteje sidadaun hosi vírus.
“Bainhira ita ko’alia kona-ba vasina, ita ko’alia kona-ba sidadaun sira no ko’alia kona-ba ema ne’ebé tenke iha konsiénsia tanba ida-ne’e importante,” nia akresenta.
Nia dehan, mundu agora atu moris 100% livre hosi COVID-19 imposivel, maibé buat ne’ebé sidadaun bele halo maka tenke hola medida sira hotu atu prevene moras ne’e labele da’et.
Populasaun elijível ho tinan 18 ba leten, to’o iha kuarta (11/08 dader tuku 10:00, tuir sistema infromasaun saúde iha Ministériu Saúde katak, totál vasina doze dahuluk iha Timor-Leste atinje ona doze 45,4%, daruak 15,3%, enkuantu iha Dili doze dahuluk 69,4%, doze daruak 46,5%, no munisípiu Ermera doze dahuluk 15% no doze daruak 2%, ne’ebé entre munisípiu sira, Ermera maka taxa vasinasaun kiik liu.
Jornalista : Antónia Gusmão
Editora : Julia Chatarina
