Traballadór sira halo konstrusaun estrada iha Maubara. Imajen TATOLI/António Gonçalves

DILI, 11 agostu 2021 (TATOLI)—Ministru Obra Públika (MOP), Salvador Eugênio Soares dos Reis Pires, hateten, reuniaun Konsellu Ministru (KM) aprova no halo alterasaun dahuluk ba Dekretu-Lei númeru 27/2020, loron 22 dezembru, ne’ebé aprova Rejime Jurídiku Sertifikasaun no Inskrisaun Empreza Konstrusaun Sivíl no Konsultoria Téknika Sivíl.

Nune’e, fó espasu ba setór privadu timor-oan sira atubele kompete obra Estadu ho valór millaun $1 to’o millaun $7,5.

“Empreza nasionál sira bele kompete kuálker obra ho baze ba kapasidade finanseira, esperénsia no rekursu umanu tuir ezjizénsia dokumentu ba konkursu públiku,” Ministru Salvador dehan iha Palásiu Governu, kuarta ne’e.

Notísia relevante: Alterasaun lejizlasaun permite empreza nasionál halo konstrusaun sivil millaun $7,5

Objetivu alterasaun lejislasaun ne’e, atu fó biban ba setór privadu sira bele kompete obra ka projetu Estadu liuhosi prosesu konkursu públiku iha Komisaun Aprovizionamentu Nasionál (CNA, sigla portugés).

MOP aprezenta alterasaun dahuluk ba Dekretu-Lei númeru 27/2020, loron 22 dezembru kona-ba pra-kualifikasaun tanba iha artigu 7 limita setór privadu nasionál sira labele kompete obra Estadu liu millaun $1 tanba ne’e bainhira altera ona maka empreza nasionál sira bele kompete iha kuakler projetu Estadu.

“Ita-nia lei ateriór fó biban ba empreza nasionál sira atu kompete obra ka projetu menus hosi millaun $1 ne’ebé agora laiha limitasuan,” nia akresenta.

Nune’e, Governu sei submete hikas lejizlasaun ne’e ba Prezidente Repúblika, Francisco Guterres ‘Lú Olo’ hodi promulga, nune’e Governu bele halo implementasaun.

Ho intervensaun lejizlativa ida-ne’e hakarak elimina limitasaun ne’ebé uluk la permite empreza nasionál sira hala’o servisu sira konstrusaun sivil nian ho valór aas liu millaun $7,5.

MOP konsege kategoriza empreza nasionál hamutuk 700, ne’ebé husi númeru ne’e prodúz ona sertifikasaun ba empreza hamutuk 697 iha área konstrusaun sivíl no emoreza konsultoria téknika sívil ne’ebé kobre munisípiu 12 inklui Rejiaun Administrativu Espesiál Oé-Cusse Ambeno  (RAEOA).

Iha tinan 2020, MOP esforsu hodi halo manutesaun ba sistema pra-kualifikasaun ne’ebé paradu durante tinan barak nia-laran atu hafasil liután empreza sira submeter dokumentu tuir rekerimentu.

Klasifikasaun dahuluk, empreza konstrusaun sivil fahe kategoria hanesan, kategoria A ho empreza 59 ne’ebé bele ezekuta projetu ho valór $1.500.000 ba leten. Kategoria B1 ho empreza 89 bele ezekuta ho valór $750.000 to’o $1.500.000.

Kategoria B2 hamutuk empreza 181 ne’ebé bele ezekuta projetu ho valór $250.000 to’o $750.000 no kategoria C hamutuk empreza 284 ne’ebé bele ezekuta projetu ho valór $25.000 to’o $250.000.

Ba klasifikasaun daruak, empreza sira iha área konsultória téknika fahe ba kategoria A ho empreza haat ne’ebé ezekuta projetu ho valór $1.500.00 ba leten, kategoria B1 empreza rua bele ezekuta ho valór $750.000 to’o $1.500.000.

Kategoria B2 ho empreza hitu ne’eb’e bele ezekuta valór $250.000 to’o $750.000 no kategoria C laiha.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here