Prezidente Sentru Atendimentu Agrikultór Kuda Ulun Bobonaro (CAAKUB) sesante, Cirílio Sirio Bere Moniz, entrega dokumentu ba prezidente eleitu, António Barreto da Conceição iha jináziu Maliana, kuarta (11/08). Imajen Tatoli/Sérgio da Cruz.

BOBONARO, 11 agostu 2021 (TATOLI)—Liuhosi asembleia jerál, agrikultór munisípiu Bobonaro hili António Barreto da Conceição, lidera Sentru Atendimentu Agrikultór Kuda Ulun Bobonaro (CAAKUB), ba mandatu tinan rua (2021-2023), substitui prezidente sesante, Cirílio Sírio Bere Moniz.

Diresaun Nasionál Agro Komérsiu Ministériu Agrikultura no Peska (MAP) realiza asembleie ne’e, atu normaliza funsionamentu serbisu CAAKUB, bazeia ba karta númeru 46/DNAC/V/2020 ne’ebé prezidente sesante submete ba hodi suspende temporária hosi ninia kargu, tanba iha dupla funsaun.

Notísia relevante:JICA konsidera foos lokál Maliana di’ak liu

Prezidente Autoridade munisípiu Bobonaro, Ernesto de Oliveira Barreto, enkoraza prezidente foun, serbisu ho profisionál no responsabilidade, hodi lori agrikultór-sira badinas liu tán iha hasa’e produsaun agríkola.

“CAAKUB atu sa’e ka tun, depende ita bot sira-nia serbisu, tanba ne’e jere didiak ba, nune’e parseiru dezenbolvimentu-sira kontinua apoia ita,” Ernesto de Oliveira Barreto hateten iha jináziu munisipál Maliana, kuarta ne’e.

Prezidente CAAKUB sesante, Cirílio Sirio Bere Moniz, rekoñese  durante mandatu la konsege halo buat barak, tanba enfrenta problema limitasaun orsamentu no rekursu umanu.

Tanba ne’e, nia husu ba prezidente foun atu serbisu ho onestidade tuir kapasidade no koñesimentu, nune’e bele responde agrikultór-sira nia ejizénsia.

Prezidente foun CAAKUB, António Barreto da Conceição, promete sei uza kapasidade atu jere sentru ne’e ba oin ho di’ak liu tán no buka mekanizmu ho setór privadu no kampañia nasionál, internasionál, nune’e bele aumenta taxa distribuisaun foos ba merkadu ho kuantidade boot.

Bainhira António Barreto hetan fiar hosi JICA  hanesan ofisiál CAAKUB iha 02 juñu 2020, konsege sosa agrikultór sira-nia hare hamutuk kilograma 59.256,58 hosi agrikultór 59 ho montante $23.702,63.

Estrutura CAAKUB periúdu 2021-2023 mak hanesan, prezidente, Atónio Barreto da Conceição, Vise prezidente, Vicente Pinto, Sekretária, Bemvinda Guterres Leto Loi, prezidente fiskalizasaun, Germano Maya de Jesus, Vise, Basílio Seixas Barros no sekretáriu, Agostino Berre Talo.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here