Kampu Basketeból. Imajen/Google

MANUFAHI, 11 agostu 2021 (TATOLI) – Prezidente Asosiasaun Basketeból Timor-Leste (ABTL) Munisipiu Manufahi, Xisto Constantino Pinheiro, husu ba Sekretáriu Estadu Juventude no Desportu (SEJD)  atu konstrui kampu basketeból iha Manufahi atu bele ajuda sira nia atividade desportiva.

“Ami iha ne’e halo atividade basketeból nian sempre utiliza hela kampu Igreja Nossa Señora Assunção nian. Ami husu ba SEJD la’ós iha tinan ne’e, maibé iha tinan oin bele konstroi netik kampu ida mai ami,” Xisto  hato’o pedidu ne’e bainhira hasoru-malu ho SEJD Abrão Saldanha iha Manufahi, kuarta ne’e.

Difikuldade seluk ne’ebé ABTL Manufahi enfrenta mak laiha kapasitasaun rutina ba arbitrajen sira, atu nune’e, bele dirije jogu ruma no treinadór klube sira.

Sekretáriu Estadu Abrão Saldanha, toma nota ba pedidu ne’e atu bele haree proposta iha Orsamentu Jerál Estadu (OJE) tinan oin.

“Iha informasaun sira ne’ebé mak Asosiasaun Basketeból hato’o ne’e informasaun di’ak tebes ba ita atu bele halo planu no ko’alia direta ho federasaun sira iha Dili,” dehan Abrão Saldanha tenik.

Kona-ba formasaun rekursu umanu liu-liu ba arbitrajen no treinadór SEJD iha ona planu atu investe ba iha ne’e la’ós Basket de’it, maibé sei investe ba iha voleiból, atletizmu no seluk tan.

Asosiasaun Basketeból Manufahi sia mahan ba iha klube basketeból hamutuk 16 ne’ebé eziste iha Munisípiu Manufahi.

Jornalista   : Filomeno Martins

Editór        : Francisco Simões

HAKEREK NO HATÁN

Please enter your comment!
Please enter your name here