Mateus de Oliveira “Naga Funu” ho Gil Sarmento da Costa ho “Lawai” halo entrevista ho jornalista hafoin hasoru malu ho Prezidente Repúblika, Francisco Guterres “Lú Olo” iha Palásiu Prezidensiál, Dili, tersa (10/08). Imajen/Mídia G-PR

DILI, 10 agostu 2021 (TATOLI)—Jerasaun Salau, Aldeia Daulorok, Saibada, Suku Manlala, Munisípiu Manatuto,  husu ba veteranu sira atu fó liman ba malu hodi lori nasaun ne’e la’o ba oin.

Liuhosi enkontru ho Prezidente Repúblika (PR), Francisco Guterres “Lú Olo” iha Palásiu Prezidensiál, Dili, tersa ne’e, reprezenta frente klandestina Salau nian, Gil Sarmento da Costa ‘Lawai’ ho Mateus de Oliveira, husu atu veteranu sira kontinua tane-malu no la bele fila kotuk ba malu hanesan tempu ohin loron.

Durante tempu okupasaun Indonézia nian iha Timor-Leste,  juventude Salau fó sira-nia kontribuisaun  liuhosi frente klandestina hodi sai liman-ain frente armada FALINTIL  nian iha vila-laran.

 “Hanesan jerasaun Salau ne’ebé uluk iha tempu rezisténsia nian asegura FALINTIL sira, ami hanesan jerasaun foin-sa’e Salau liuliu komemorasaun loron FALINTIL iha  20 agostu, tinan ne’e, ami husu liuliu ba na’in ulun sira, veteranu sira ne’ebé mak uluk subar hela iha Salau atu fó liman hamutuk tau hanoin hamutuk para lori nasaun ne’e la’o ho didi’ak,” Gil Sarmento da Costa ‘Lawai’ hateten ba jornalista sira hafoin audiénsia ho Prezidente Repúblika.

Juventude rezisténsia Salau husu mós ba Governu atu tau-matan mós ba labarik sira-ne’ebé mak uluk fó apoiu ba FALINTIL sira iha ai-laran atu bele rekoñese mós sira-nia direitu.

Iha enkontru ne’e, Prezidente Repúblika, Francisco Guterres “Lú Olo” lia-tun dehan, lei ne’ebé mak agora daudaun veteranu sira prepara no hosi lei ne’e seidauk iha ida mak ko’alia kona-ba labarik sira-nia partisipasaun iha funu, tanba-ne’e mak aban bainrua labarik sira-ne’ebé mak fó sira-nia kontribuisaun ba rai ida-ne’e mak karik komisaun rekoñese no halo lei ida mak Prezidente Repúblika mós prontu atu aprova.

Mateus de Oliveira “Naga Funu” ho Gil Sarmento da Costa ho “Lawai” iha tempu rezisténsia sira sei iha idade ki’ik, maibé kontribui ativa ba apoiu frente armada FALINTIL hodi subar membru FALINTIL sira.

 “Momentu ne’ebá ho idade ne’ebé mak ki’ik entaun ami mai fó hanoin fila fali, tanba iha tempu ida agora mós hala’o hela verifikasaun dadus nia entaun ami mós mai hato’o fila fali ba Prezidente Repúblika, atu hanoin fila fali uluk tanba ami ho idade ki’ik no labarik barak idade hanesan ho ami iha timor laran fó kontribuisaun boot ba prosesu luta ida-ne’e,” Mateus de Oliveira “Naga Funu”  hateten.

Nia fó sasin katak tempu rede rezisténsia nian liuliu iha Frente Klandestina, labarik barak ho idade tinan 13 mai kraik barak iha territóriu Timor-Leste kontribui iha rede klandestina liuliu oinsá fó protesaun ba komandante FALINTIL sira.

Jornalista   : Osória Marques

Editór        : Francisco Simões

HAKEREK NO HATÁN

Please enter your comment!
Please enter your name here