Unidade Patrullamentu Fronteira (UPF) kompaña Alfa postu Tunubibi, kaptura Timoroan na'in-haat ne'ebé tenta hakat ilegál ba Atambua, Indonézia. Imajen PNTL.

BOBONARO, 10 agostu 2021 (TATOLI)—Polísia Nasionál Timor-Leste (PNTL), liuhosi Unidade Patrullamentu Fronteira (UPF), detein Timoroan na’in-haat ne’ebé tenta hakat ilegál ba Atambua, Nusa Tenggara Timur (NTT) Indonezia, iha segunda (09/08) kalan.

Komandante UPF, Superintendente, Euclides Belo, hateten sidadaun na’in-haat ne’e detein liuhosi operasaun iha liña me’an área Tunubibi fronteira Terrestre, entre Timor-Leste ho Indonézia.

Notísia relevante:PNTL kaptura sidadaun 11 tenta hakat ilegál ba Atambua

“Horikalan iha tuku 23:00, ita-nia membru UPF kompaña Alfa Tunubibi, kaer joven na’in-haat iha área mota laran, ne’ebé tenta ultrapasa fronteira ilegalmente ba Indonézia,” Komandante ne’e informa liuhosi komunikadu ne’ebé Agência Tatoli asesu, tersa ne’e.

Sidadaun na’in-haat ne’e UPF halo ona identifikasaun no entrega ona ba Komandu Polísia munisípiu Bobonaro, atu halo investigasaun tuir área jurídiku munisípiu nian.

UPF koordena ona ho COE-BOP, hodi asegura situasaun iha fronteira terrestre, tanba oras-ne’e daudaun pasajen ilegál buras.

“Ami simu orientasaun hosi Komandu Jerál PNTL, hodi alerta no halo prevensaun másimu atu bele garante liña fronteira, sai fatin seguru ba ema hotu-hotu liu-liu iha Maliana, Suai to’o Oé-cuse,” nia esplika.

Jornalista   : Sérgio da Cruz

Editór         : Cipriano Colo

HAKEREK NO HATÁN

Please enter your comment!
Please enter your name here