UNICEF asina nota entrega ekipamentu eskritóriu no komunikasaun ba Sekretariadu SUN Movement, segunda (09/08). Imajen/Espesiál

DILI, 10 agostu 2021 (TATOLI)-Fundu Nasaun Unida ba Infánsia (UNICEF, sigla inglés), segunda (09/08), asina nota entrega ekipamentu eskritóriu no komunikasaun ba Sekretariadu Scaling Up Nutrition (SUN) Movement liuhosi pontu fokál, Filipe da Costa iha lansamentu prémiu nutrisaun Primeiru-Ministru iha Salaun City 8, Manleuana, Has Laran, Dili.

Reprezentante UNICEF iha Timor-Leste, Bilal Autang Zeb Durrani hateten, ekipamentu eskritóriu no komunikasaun ne’ebé entrega ba SUN Movement ne’e tanba parte-rua refere konkorda ona atu UNICEF entrega ba Sekretariadu SUN Movement iha Gabinete de Apoiu Sociedade Civíl ka Gabinete Primeiru Ministru (GASC-GPM) hodi hala’o sira-nia serbisu ho di’ak.

“Ekipamentu ne’ebé ami entrega ba SUN Movement mak hanesan Desktop unidade haat, laptop unidade rua, imprime unidade ida, toner unidade rua, projector unidade ida, tela projector, camera konjuntu ida, no camera ba konferénsia konjuntu ida ho valór orsamentu $10.165,” Bilal Autang Zeb Durrani hateten, liuhosi komunikadu imprensa ne’ebé Agência Tatoli asesu, tersa ne’e.

Nia dehan, liuhosi ekipamentu ne’ebé UNICEF apoiu ba oin Sekretariadu SUN Movement no UNICEF sei kolabora hamutuk ho ekipa UNICEF kontinua rejista no relata kona-ba ekipamentu listadu ne’ebé entrega ona hodi sira kontinua hala’o inspesaun ba kondisaun ekipamentu sira.

Iha nota entrega ekipamentu refere, Koordenadór Gabinete de Apoiu Sociedade Civil (GASC) no Pontu Fokál Primeiru-Ministru ba SUN Movement, Filipe da Costa dehan, apoiu ne’ebé sira hetan tanba UNICEF parseiru-ida importante tebes ba Governu hodi apoiu ba programa Governu hodi atinje objetivu Estadu nian.

“Ha’u sente ekipamentu ne’e importante tebes hodi apoiu serbisu Sun Movement nian tanba liutiha lansamentu Timor-Leste nia adezaun ba SUN iha 13 Outubru 2020, ita enfrenta hela problema fasilidade ba eskritóriu no komunikasaun entaun ekipamentu ne’ebé ami hetan importante tebes hodi apoiu serbisu loron-loron sekretariadu nian,” Filipe da Costa hateten.

Aleinde UNICEF apoiu ekipamentu eskritóriu no komunikasaun ba Sekretariadu SUN Movement, Koordenadór GASC, Filipe da Costa relata katak UNICEF apoiu tan ofisiál téknika sira ba asistente mídia komunikasaun, no tékniku informátiku Web Master no Network Administrator ne’ebé rekrutamentu sira sei la’o daudaun.

Iha asinatura nota entrega ne’e partisipa hosi membru Governu, korpu diplomátiku, ajénsia Nasoins Unidas, organizasaun naun-governamentál tantu nasionál no internasionál, grupu juventude, manan-na’in prémiu prezidente 2012-2017, no to’os-na’in sira.

Timor-Leste ofisiálmente lansa no sai ona membru SUN Movement ba dala-62 iha loron 13 Outubru 2020 ho objetivu atu nasaun membru sira fahe esperiénsia oinsá hakotu ka halakon ona má-nutrisaun iha idak-idak nia nasaun.

Jornalista  : Arminda Fonseca

Editór        : Francisco Simões

HAKEREK NO HATÁN

Please enter your comment!
Please enter your name here