Sesaun plenária iha Parlamentu Nasionál. Imajen/Dok.TATOLI

DILI, 10 agostu 2021 (TATOLI)-Parlamentu Nasionál (PN),ohin aprova votu pezár no solidariedade ba vítima inundasaun ne’ebé akontese foinlalais iha Repúblika Populár Xina hodi rezultadu ema barak mate no ema barak lakon hela-fatin.

Deputadu PN aprova votu pezár no votu solidariedade ne’e ho rezultadu votasaun a-favór 44, kontra 0 no abstensaun 0.

Notísia Relevante :PN Aprova Votu Solidariedade ba Xina

“Votu pezár no solidariedade ba Repúblika Populár Xina aprovadu,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária.

Iha biban hanesan Sekretária Meza Parlamentu Nasionál, Deputada Lídia Norberta dos Santos, fó-sai, iha loron 20 jullu liubá, akontese udan boot iha Repúblika Populár Xina hodi rezulta ema na’in 300 mak mate, ema barak dezafaresida no vítima barak mak sai hosi hela-fatin hodi ba refujia iha fatin seluk.

Iha provínsia Henan rejista valór presipitasaun (curah hujan) nunka akontese antes ne’e, ne’ebé halo estimasaun katak ema millaun 14,5 afetada no sidadaun millaun 1,5 mak re-alokadu hafoin uma 89.000 hetan estragu totál. Enkuantu iha provínsia Xina de’it perda ekonómika ninia estimasaun liu millaun $2.000.

Ho akontesimentu trájiku, Parlamentu Nasionál espresa votu pezár ba vítima mortál no manifesta solidariedade ba família vítima sira ba povu no autoridade provinsiál Henan iha Repúblika Populár Xina nian.

Deputadu proponent ba votu pezár no  solidariedade ne’e kompostu hosi deputadu Duarte Nunes, Francisco Miranda Branco, António da Conceição, José Agustinho Sequeira ‘Somotxo’ no deputada Domingas dos Santos.

Entretantu, tuir dadus ne’ebé maka Tatoli asesu husi https://www.worldometers.info/ to’o tinan 2020 ne’e populasaun Xina hamutuk ema 1.439.323.776. 

Jornalista:Evaristo Soares Martins

Editór:Agapito dos Santos

HAKEREK NO HATÁN

Please enter your comment!
Please enter your name here