Debate estensaun renovasaun Estadu Emerjénsia iha sala plenária PN, kuarta (28/04). Imajen/G-VPM

DILI, 10 agostu 2021 (TATOLI)-Reprezentante Povu iha uma fukun Parlamentu Nasionál, tersa ne’e aprova ona votu konfirmasaun ba estensaun Estadu emerjénsia ba dala-XVI hafoin iha loron 27 fulan- jullu liubá autoriza de’it liuhosi Komisaun Permanente.

Bazeia ba Konstituisaun RDTL no Rejimentu Parlamentu Nasionál katak bainhira Komisaun Permanente mak autoriza Estadu emerjénsia ka estadu esesaun hosi Komisaun Permanente tenke hetan konfirmasaun  iha plenária.

Notísia Relevante:Prezidente Repúblika dekreta estadu emerjénsia ba dala-XVI

Deputadu sira aprova votu konfirmasaun ne’e  ho a-favór 34, kontra 0 no abstensaun 18.

Tuir Rejimentu Parlamentu Nasionál artigu 120 (Votasaun no forma ba autorizasaun) númeru 3 katak autorizasaun ne’e bainhira fó hosi Komisaun Permanente tenke hetan konfirmasaun iha reuniaun plenária Parlamentu Nasionál.

“Nune’e Lei kona-ba konfirmasaun ba deklarasaun Estadu emerjénsia aprovadu,” Prezidente Parlamentu Nasionál, Deputadu Aniceto Longuinhos Guterres Lopes, anunsia iha plenária.

Konfirmasaun deklarasaun Estadu emerjénsia ba dala-XVI ne’e hala’o tuir dekretu Prezidente Repúblika númeru 56/2021, 27 jullu, ne’ebé autoriza hosi Komisaun Permanente Parlamentu Nasionál nian liuhosi rezolusaun Parlamentu Nasionál númeru 20/2021, 27 jullu liubá.

No iha  loron 27 fulan-jullu 2021 liubá, Parlamentu Nasionál liuhosi Komisaun Permanente autoriza ona Prezidente Repúblika  hodi dekreta Estadu emerjénsia ba dala-XVI ba territóriu nasionál.

Entretantu, renovasaun deklarasaun Estadu emerjénsia ba dala-XVI ne’e aprovadu ho rezultadu votasaun nominál a-favór 18, kontra 0 no abstesaun 13 nune’e autoriza Xefe Estadu dekreta estadu emerjénsia ba loron 30 tán, hahú hosi oras 00.00 iha loron 1 agostu 2021  no termina iha oras 23.59 loron 30 agostu 2021.

Jornalista:Evaristo Soares Martins

Editór :Agapito dos Santos

HAKEREK NO HATÁN

Please enter your comment!
Please enter your name here