Uma Fukun Parlamentu Nasionál. Imajen/Espesiál

DILI, 10 agostu 2021 (TATOLI)-Parlamentu Nasionál (PN) tersa ne’e aprova ona projetu-rezolusaun atu harii edifísiu própriu uma fukun Parlamentu Nasionál nian iha área Caicoli, Postu Administrativu Vera Cruz, Munisípiu Dili.

Projetu-rezolusaun ne’e aprovadu ho rezultadu votasaun a-favór 34, kontra 0 no abstensaun 0.

Notísia Relevante :PN sei kontinua buka fatin atu harii edifísiu própriu

“Nune’e projetu-rezolusaun hosi Parlamentu Nasionál pasa kona-ba atu harii edifísiu foun pasa,” Prezidente Parlamentu Nasionál, Deputadu Aniceto Longuinhos Guterres Lopes, anúnsia liuhosi plenária.

Xefe Lejizladór ne’e fó-sai katak Governu hatudu ona fatin iha área Caicoli atu uza hodi konstrui edifísiu foun Parlamentu Nasionál nian.

“Agora hein de’it aprovasaun formál tanba Primeiru-Ministru fó tiha ona despaxu hodi hatudu fatin ne’e iha Caicoli,” PPN hateten.

Área ne’ebé maka atu uza hodi harii edifísiu PN ne’e perkore husi edifísiu Ministériu Solidaridade Sosiál no Inkluzaun (MSSI) nia kotuk to’o iha área eis edifísiu World Vision Caicoli Dili.

Purtantu, iha loron 30 abríl 2021 liubá, Sekretáriu Jerál Parlamentu Nasionál, Adelino Afonso Gomes fó-sai katak prosesu harii edifísiu própriu Parlamentu Nasionál (PN) nian tama ona iha faze estudu viabilidade no dezeñu.

Orsamentu privativu prevee tiha millaun $3 maibé iha orsamentu retifikativu foin lalais sofre alterasaun millaun $2,5 entaun verba kapitál kapitál dezenvolvimentu hosi Parlamentu Nasionál nian hela de’it rihun $500.

Maibé, faze estudu viabilidade no dezeñu prevee ona iha item Fundu Infraestrutura ho osan hamutuk rihun $240.

“Edifísiu Parlamentu Nasionál agora daudaun iha faze estudu no dezeñu, estudu no dezeñu ne’e osan iha Fundu Infraestrutura ne’ebé orsamentu tiha ona dezde tinan rua liubá, hamutuk rihun $240, osan ne’e sufisiente halo faze preliminária estudu no dezeñu ne’e,” nia informa ba jornalista sira.

Entretantu iha loron 19 fulan-agostu 2020 liubá, Prezidente Parlamentu Nasionál, Deputadu Aniceto Longuinhos Guterres Lopes, hateten vizaun atu harii edifísiu própriu Parlamentu Nasionál inklui rezidénsia ba deputadu sira tanba kada lejizlatura gastu ba subsídiu boot tebes.

“To’o agora deputadu ida simu $450 ba alojamentu kada fulan, tinan 1 deputadu ida hetan $5.400, tinan ida deputadu 65 hetan $351.000,00. Iha  lejizlatura ida (tinan 5) Estadu gasta S1.755.000,00 ba dei’t alojamentu. Bainhira harii duni redús ka elimina totál orsamentu ida-ne’e  entaun presiza duni rezidénsia ba deputadu besik kedas sede Parlamentu Nasionál. Kestaun seluk mak efikásia tempu servisu,” Prezidente Parlamentu Nasionál argumenta iha momentu ne’ebá.

Nia afirma, públiku hatene ona kona-ba frakeza kumprimentu oras servisu deputadu sira. Razaun barak liu kona-ba inkumprimentu oras servisu ne’e mak distánsia hela-fatin ho sede Parlamentu Nasionál ne’ebé dook ba deputadu lubuk ida

Deputadu sira presiza kumprimenta rigorozu oras servisu tenke kondisiona ho fatin no fasilidade servisu ne’ebé adekuadu nune’e bele produz rezultadu ne’ebé ho kualidade di’ak liután iha futuru.

“Ne’e duni sede Parlamentu Nasionál, rezidénsia ba deputadu, fasilidade no kondisaun adisionál seluk ne’ebé relevante presiza hanoin no tetu agora para lori ita hotu kontribui ba forma ita-nia Parlamentu Nasionál ho deputadu ne’ebé dezempeña servisu ho kualidade di’ak liután iha futuru,” nia katak.

Notísia Relevante :Prosesu harii edifísiu própriu, PN hein notifikasaun MJ

Jornalista: Evaristo Soares Martins

Editór:Agapito dos Santos

HAKEREK NO HATÁN

Please enter your comment!
Please enter your name here