Xefe Delegasaun Timor-Leste ba Luanda no Vise Primeiru-Ministru no Ministru Planu no Ordenamentu, José Maria dos Reis, entrega relatóriu delegasaun ba Primeiru Ministru, Taur Matan Ruak, iha Palasiu Governu, tersa (10/08). Imajen TATOLI/Francisco Sony

DILI, 10 agostu 2021 (TATOLI)–Xefe delegasaun ba konferénsia datoluk Komunidade País Lian Portugés (CPLP, sigla portugés) iha Luanda, Angola, relata rezultadu serbisu ba Primeiru-Ministru (PM), Taur Matan Ruak, ne’ebé ko’alia liu kona-ba akordu mobilidade.

Tuir Xefe Delegasaun no Vise Primeiru-Ministru no Ministru Planu Ordenamentu, José Maria dos Reis, José Maria dos Reis, kona-ba asuntu mobilidade, PM rekomenda atu halo diskusaun kle’an hodi haree loloos atu adota polítika enkuadramentu iha CPLP.

“Asuntu lubuk ida maka diskute, prinsipalmente ba mobilidade, tanba ne’e tenke diskute, ezemplu hanesan Cabo Verde nian, avansa ona ho ratifikasaun iha Parlamentu Nasionál, ne’ebé atu implementa polítika ne’e, ba dahuluk tenke ratifika no bainhira akontese ona, signika tenke diskute oinsá akordu bilaterál país no implementasaun polítika,” Xefe Delegasaun hateten iha Palásiu Governu, tersa ne’e.

Enkontru ne’e partisipa mós hosi Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, ne’ebé inklui hotu iha delegasaun.

“Antes ne’e ami relata ona ba Prezidente Repúblika atu akompaña situasaun ne’e no kestaun ne’ebé Primeiru-Ministru fó hanoin ba MNEK mak pontu balun ne’ebé maka halo diskusaun iha simeira, liuliu kona-ba mobilidade entre sidadaun membru CPLP,” nia akresenta.

Notísia relevante: http://tatoli.tl/pt/2021/07/17/acordo-de-mobilidade-na-cplp-aprovado-na-cimeira-de-luanda/

http://tatoli.tl/pt/2021/07/22/zacarias-albano-pede-ratificacao-de-acordo-de-mobilidade-no-parlamento-de-cada-pais-da-cplp/

Iha enkontru ne’e, Xefe Delegasaun entrega relatóriu serbisu ba Xefe Governu durante vizita traballu iha Portugal no Luanda iha semana tolu nia laran.

Iha loron 17 jullu, Ministru Negósiu Estrajeiru no Kooperasaun hosi CPLP asina akordu mobilidade entre país membru, hafoin aprovasaun hosi Xefe Estadu no Governu.

Akordu mobilidade ne’e, destina iha médiku, emprezáriu, akadémiku, estudante no investigadór ne’ebé kaer pasaporte diplomátiku, ofisiál, espesiál no servisu.

Jornalista : Antónia Gusmão

Editora    : Julia Chatarina

HAKEREK NO HATÁN

Please enter your comment!
Please enter your name here