Diretór Jerál Floresta, Kafé no Plantasaun Indústria, Raimundo Mau. Imajen TATOLI/Francisco Sony

DILI, 10 agostu 2021 (TATOLI)—Ministériu Agrikultura no Peska (MAP) prevee ona orsamentu ba tinan 2022 iha Diresaun Jerál Floresta, Kafé no Plantasaun Indústria hamutuk millaun $3,2 hodi dezenvolve reflorestasaun no reabilitasaun plantasaun kafé.

“Orsamentu ne’ebé parte diresaun hetan ba tinan oin sei tau prioridade ba reabilitasaun kafé, dezenvolvimentu komunidade sira ne’ebé iha planta industriál no investimentu iha ai-kameli, no ai seluk tan, ne’ebé mak iha valór indústria inklui kontinua área protejida no parke nasionál,” Diretór Jerál Floresta, Kafé no Plantasaun Indústria MAP, Raimundo Mau, ba Agência TATOLI , iha salaun MAP, Comoro, tersa ne’e.

Tuir Dirijente ne’e, parte MAP liuhosi diresaun planeia ona to’o tinan 2030 bele reabilita plantasaun kafé iha rai ektare 40.000.

“Agora ita hamutuk ho parseiru reabilita ektare 17.000, ne’ebé kada tinan nafatin ektare 500 tenke reabilita, tanba ne’e hosi Orsamentu Jerál Estadu (OJE) no parseiru halo reabilitasaun kafé tuan sira hodi bele hasa’e produsaun kafé,” nia akresenta.

Notísia relevante: MAP-Universidade Singapura asina entendimentu peskiza kona-ba flora no fauna

Aleinde ne’e, parte MAP tinan oin hakarak foka mós ba konservasaun flora no fauna.

“Liu-liu abitante moris iha área protejida no parke nasionál sira, tanba daudaun ita hatene aktu ilegál sira la’o hela hasoru balada fuik, tanba ne’e presiza sensibilisasaun nafatin relasiona ho área protejida sira,” nia hatutan.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here