MEJD ho UNDP asina akordu kooperasaun atu hadi’a edukasaun ICT ba eskola sekundária profisionál sira iha Timor-Leste. Akordu kooperasaun ne’e asina iha salaun MEJD, Dili, tersa (21/07/20). Imajen Tatoli/ Egas Cristovão

DILI, 10 agostu 2021 (TATOLI)- Programa Nasaun Unida ba Dezenvolvimentu (PNUD) no Ministériu Edukasaun, Juventude no Desportu (MEJD), tersa ne’e, asina memorandu entendimentu ida hodi reforsa kualidade edukasaun liuhosi Informasaun Komunikasaun no Teknolojia (ICT-sigla inglés) iha eskola sekundária no vokasionál iha Dili no munisípiu-sira.

Ministru Edukasaun, Juventude no Desportu, Armindo Maia, hateten, memorandu entendimentu ne’e
ba akordu fahe kustu nian ida hodi apoia realizasaun objetivu sira ne’ebé estabelese ona iha Planu Estratéjiku Nasionál Edukasaun nian ba 2011-2030.

“Projetu ne’e di’ak tebes atu apoiu ita-nia Edukasaun iha Timor-Leste (TL), liu-liu iha mundu ne’ebé nakonu ho dijitalizasaun,” Ministru Armindo Maia hateten bainhira asina memorandu entendimentu entre parte rua  iha salaun MEJD, Vila-Verde, Dili.

Programa ka projetu ne’e sei implementa dahuluk iha Dili tuir kapasidade orsamentu ho alvu atu hadi’a kualidade edukasaun iha Timor-Leste no reforsa kualidade ICT iha eskola sekundária no profisionál sira.

Orsamentu ne’ebé sei implementa ba projetu ICT hamutuk $40.000 ho nia diskrisaun hosi osan refere purvolta $30.000 hosi PNUD no $10.000 hosi MEJD.

Lazima Onta-Bhatta hanesan Adjuntu Reprezentante Rezidente PNUD nian, hateten PNUD agradese tebes ba MEJD ba sira-nia fiar no apoiu ba inisiativa foun ne’e atu dezenvolve projetu edukasaun ICT ba Timor laran tomak.

Akordu ne’e  kontinua dezenvolve bazeia ba susesu no lisaun sira ne’ebé aprende hosi PNUD nia projetu edukasaun ICT foin lalais ne’e iha Rejiaun Administrativa Espesiál Oé-Cusse Ambeno (RAEOA).

“Iha Oé-Cusse ita benefisia ona eskola 23 ne’ebé akumula estudante 5.500 no profesór hamutuk 160, tanba ne’e akordu projetu ICT ne’ebé ita foin halo ita sei fó ekipamentu ba eskola-sira ho infraestrutura sira hosi internet, fízika no dijitál ne’ebé presiza,” Lazima Onta-Bhatta haktuir.

Jornalista   : Arminda Fonseca

Editór         : Francisco Simões

HAKEREK NO HATÁN

Please enter your comment!
Please enter your name here