Área florestál iha Timor-Leste. Imajen/Dreamstime

DILI, 10 agostu 2021 (TATOLI)—Diretór Jerál Floresta, Kafé no Planta Industriál hosi Ministériu Agrikultura no Peska (MAP), Raimundo Mau, hateten, kada tinan Timor-Leste hetan degradasaun floresta ektare 10.000.

“Degradasaun iha ai-laran, ne’ebé maka hosi di’ak sai ba a’at, tanba ema lere no tesi, ne’ebé antes ne’e mahar sai mihis no ema sunu, tanba ne’e maka afeta ektare 10.000 hetan degradasaun kada tinan,” Diretór Jerál informa ba Agência TATOLI, iha ninia knaar fatin, MAP Comoro, tersa ne’e.

Tuir Dirijente ne’e, degradaun floresta kuaze akontese iha munsípiu hotu, maibé degrasaun floresta bo’ot liu akontese iha Dili.

“Degradasaun floresta bo’ot liu iha área ne’ebé populasaun barak hanesan Dili, enkuantu munisípiu seluk, populasaun foti ai-sunu no lori ba dapur hodi tein no seluk fa’an,” nia akresenta.

Tuir dadus hosi MAP, Timor-Leste kontein totál área florestál hamutuk ektare 1.160.214, ne’ebé ekivalente ho 77,78% hosi totál área terrestre, ne’ebé Governu determina ona hodi uza ektare 745.145 (51%) ba intervensaun umana.

Área floresta iha Timor Leste komesa redús ona hosi ektare 1.053.000 to’o 869.000 iha tinan 2003 to’o 2012.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here