Primeiru Ministru, Taur Matan Ruak, prezide reuniaun extraordinária komisaun interministeriál koordenasaun no prevensaun kontra surtu COVID-19, iha Palasiu Governu, tersa (10/08). Imajen TATOLI/Francisco Sony

DILI, 10 agostu 2021 (TATOLI)–Komisaun Interministeriál Koordenasaun ba Implementasaun Medida Prevensaun no Kontrolu COVID-19 realiza reuniaun ne’ebé prezide hosi Primeiru-Ministru (PM), Taur Matan Ruak, hodi avalia serbisu sira ne’ebé implementa ona.

Reuniaun ne’e partisipa hosi Vise Primeiru-Ministru no Ministru Planu Ordenamentu, José Maria dos Reis, Vise Primeiru-Ministru no Ministra Solidaridade Sosiál no Inkluzaun, Armanda Berta dos Santos, inklui ministériu implementadór seluk.

Vise Primeiru-Ministru, Armanda Berta, hateten, objetivu hosi reuniaun ne’e hodi haree hamutuk fali medida sira ne’ebé implementa ona ligadu ho prevensaun no mitigasaun surtu COVID-19 iha Timor-Leste.

“Agora seidauk hasai desizaun ruma. Hosi enkontru ne’e sei haree filafali medida sira hotu, nune’e bele deside situasaun fila ba normalidade,” Armanda Berta relata hafoin ramata reuniaun extraordinária, iha Palásiu Governu, tersa ne’e.

Tuir Ministra, medida prevensaun ne’ebé implementa ona ho efetivu mak vasina kontra pandemia, ne’ebé vasina iha territóriu tomak bainhira atinje ona 70%, maka bele deklara ona normalidade.

“Ho ida-ne’e Governu sei iha hanoin ida atu haree hamutuk estratejia saida mak atu implementa hafoin deklara normalidade,” nia hatutan.

To’o loron 09 agostu, totál doze vasina ne’ebé fó ba ema ho idade 18 ba leten iha territóriu tomak hamutuk 429.983, kompostu hosi 317.936 (42,1%) simu ona doze dahuluk no 111.047 (14,7%) simu ona doze daruak.

Vasina ho tipu AtraZeneca hamutuk 370.370 no vasina ho tipu Sinovac hamutu 58.613, ho totál hamutuk 429.983.

Antes ne’e, aprovasaun Orsamentu Retifikativu tinan 2021, halo mós mudansa ba dotasaun Fundu COVID-19, ne’ebé ho montante inisiál $31.000.000 hetan ona reforsu $256.641.793, nune’e ninia totál hamutuk $287.641.793 hodi finansia medida sosiu-ekonómiku.

Medida sosiu-ekonómiku ne’ebé implementa ona mak hanesan apoia ba traballadór no Cesta Bázika, enkuantu medida sosiu-ekonómiku ne’ebé sei iha prosesu nia laran maka moratória kréditu millaun ho totál kustu implementasaun $2, izensaun pagamentu propina ba estudante ensinu superiór millaun $14, subsídiu internet ba estudante ensinu superiór millaun $2,2, sosa produtu alimentár hosi produtór lokál millaun $12.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here